កាលពីឆ្នាំទៅមិញ កម្ពុជាពិតជាមានមោទកភាព ដែលបុរសឯក លាវ វេងហួរ Mister Friendship Cambodia 2023 ដណ្តើមបានតំណែងនៅលើឆាកអន្តរជាតិកម្មវិធី Mister friendship International។ នេះសបញ្ជាក់ឱ្យឃើញថា បេក្ខភាពកម្ពុជាពិតជាមានទំាងរូបសម្រស់ សមត្ថភាព និង ចំណេះដឹង អាចប្រជែងឈ្នះបេក្ខភាពខ្លាំងៗមកពីជុំវិញពិភពលោក។ យ៉ាងណាមិញ សម្រាប់ឆ្នាំ ២០២៤ នេះ កម្មវិធី Mister Friendship Cambodia ទើបបានរកឃើញម្ចាស់តំណែងថ្មីមួយទៀត ដែលមានសមត្ថភាព និង រូបសម្រស់មិនចាញ់ម្ចាស់តំណែងឆ្នាំមុនឡើយ នោះគឺបុរសសង្ហា ជា ឧត្ដម ហ្វីឌែល។
ជាការពិតណាស់ ក្រោយប្រកួត និង ជ្រើសរើសយ៉ាងស្វិតស្វាញ ទីបំផុត លោក ជា ឧត្ដម ហ្វីឌែល បានក្លាយជាម្ចាស់តំណែង Mister Friendship Cambodia 2024។ លោកមានអាយុ ២៨ ឆ្នាំ កម្ពស់ ១,៨០ ជាកូនខ្មែរកើត និង ធំធាត់ នៅប្រទេសបារាំង ហើយឥលូវនេះ លោកបានផ្លាស់ទីលំនៅមកទីក្រុងភ្នំពេញ ជាកន្លែងដែលលោកធ្វើការជាអ្នកថតកាំរស្មីនៅមន្ទីរពេទ្យ និង ជាអ្នកស្ម័គ្រចិត្តជាមួយអង្គការក្រៅរដ្ឋាភិបាល ដែលបង្រៀនភាសាអង់គ្លេស និង បារាំង។ លោកក៏បន្តចំណង់ចំណូលចិត្តទៅលើការថតរូបផងដែរ។ លោកអាចនិយាយបាន ៣ ភាសាគឺ បារាំង អង់គ្លេស និង ខ្មែរ។
បច្ចុប្បន្ន បុរសឯក ជា ឧត្ដម ហ្វីឌែល បានកំពុងហ្វឹកហាត់ត្រៀមខ្លួនទៅប្រកួតកម្មវិធី Mister Friendship International 2024 ដែលនឹងធ្វើឡើងនៅប្រទេសតៃវ៉ាន់ឆាប់ៗនេះ។ តាមរយៈមុខមាត់ រាងរៅ សមត្ថភាព ចំណេះដឹង រួមទាំងភាសា កម្ពុជាក៏សង្ឃឹមដែរថា ឆ្នាំនេះកម្ពុជាអាចនឹងឈ្នះលើឆាកអន្តរជាតិជាថ្មីម្តងទៀត៕
