(វីដេអូ) លែងហ៊ានប្រកែកទៀតហើយ! ដាឡែត អត់មាត់ៗទេ តែសុំ ម៉ាលីន រៀបការរ៉ូមែនទិកអស់ទាស់

ពិតណាស់ ដ្បិតតែចាកចេញពីកម្មវិធី MasterChef Cambodia រដូវកាលទី ៣ ហើយក្តី ប៉ុន្តែអតីតបេក្ខជនឆ្នើម លោក ចៅ ដាឡែត នៅតែទទួលបានការគាំទ្រ និង ចាប់អារម្មណ៍ពីសកម្មភាពឯកជនរបស់លោកដូចដើម។ លើសពីនោះ គឺទំនាក់ទំនងរវាងលោក និង បេក្ខជន ឆៃ តារាម៉ាលីន តែម្តង។

ជាក់ស្ដែង កាលពីកន្លងទៅ អ្នកគាំទ្រលោក ចៅ ដាឡែត និង កញ្ញា ឆៃ តារាម៉ាលីន បានផ្ទុះការចាប់អារម្មណ៍ និង ច្រណែនគូនេះមិនតិចនោះទេ ដោយបានឃើញវីដេអូរបស់លោក ដាឡែត បានជិះរថភ្លើងរាប់រយគីឡូពីខេត្តពោធិ៍សាត់ ទៅជួបកញ្ញា ម៉ាលីន ក្នុងថ្ងៃកំណើតរបស់នាងដល់ខេត្តកំពត។

អ្វីដែលកាន់តែធ្វើឱ្យអ្នកគាំទ្រញញឹមបិទមាត់មិនជិត គឺសកម្មភាពរបស់កំលោះ ដាឡែត បំពេញតួនាទីជាបុរសដើមទ្រូងប្រាំហាត់ ជួយធុរៈគ្រប់សព្វបែបយ៉ាងក្នុងផ្ទះលំហែរបស់កញ្ញា ម៉ាលីន ដោយមានទាំងចម្អិនម្ហូប កាប់ឆ្ការព្រៃ បោសសម្អាតផ្ទះ និង បោកគក់ខោអាវទៀតផង។

មិនត្រឹមប៉ុណ្ណោះ អ្វីដែលកាន់តែធ្វើឱ្យអ្នកគាំទ្រសង្ស័យពីទំនាក់ទំនងរបស់ ដាឡែត និង ម៉ាលីន អាចនឹងមានដំណឹងល្អក៏ថាបាន ក្រោយពីបានឃើញខាងប្រុស ស្កាត់ទៅជួយការងារនៅស្រុកកំណើតខាងស្រីជាច្រើនថ្ងៃដូចគ្រួសារតែមួយទៅហើយ។ ម្យ៉ាងវិញទៀតនោះ វីដេអូមួយរបស់លោក ដាឡែត បង្ហោះឡើងលើ Tik Tok ដើម្បីថតផ្សព្វផ្សាយផលិតផលក៏ពិតមែន ប៉ុន្តែអ្នកគាំទ្រកាន់តែចាប់ភ្លឹក ព្រោះអ្នកទាំងពីរ បាននិយាយពីរឿងសុំរៀបការ មើលទៅដូចនិយាយពីរឿងពិតរបស់ពួកគេ។

ដោយឡែក ស្របពេលមហាជនអ្នកគាំទ្រកំពុងសង្ស័យថាជិតមានដំណឹងល្អ ស្រាប់ថ្មីៗនេះ ម៉ាលីន និង ដាឡែត ធ្វើឱ្យអ្នកគាំទ្ររំភើបមិនតិចឡើយ ខណៈបានឃើញវីដេអូនៃសកម្មភាពរបស់អ្នកទាំងពីរបានណាត់ជួបគ្នាទៅញ៉ាំអាហារយ៉ាងរ៉ូមែនទិច ថែមទាំងបានជិះឧទ្ធម្ភាគចក្រមើលទេសភាពជាមួយគ្នាយ៉ាងផ្អែមល្ហែម ព្រមទាំងពេលចុះពីលើឧទ្ធម្ភាគចក្រភ្លាម ដាឡែត ក៏បានលត់ជង្គង់សុំ ម៉ាលីន រៀបការទៀតផង។

យ៉ាងណាមិញ ចំពោះវីដេអូសកម្មភាពនៃការសុំរៀបការនេះដែរ សាមីខ្លួនទាំងពីរ ក៏ពុំទាន់បញ្ជាក់ច្បាស់ថាជាការពិតឬយ៉ាងណាដែរ ខណៈខាងស្រី គឺកញ្ញា ម៉ាលីន បានខមមិនក្រោមវីដេអូថា ៖ «បងៗខ្ញុំប្រាប់រឿងមួយ…video ហ្នឹងគេឱ្យពួកខ្ញុំហាត់សមទុកថតកុនទេ ពិតៗអត់កុហកទេ»៕

សូមទស្សនាវីដេអូខាងក្រោម៖