មួយរយៈចុងក្រោយនេះ ស្រីស្អាតកូនខ្មែរកាត់បារាំង Melia Constantin ដែលជាតារាសម្ដែង និង តារាម៉ូឌែលដ៏មានប្រជាប្រិយភាព ត្រូវបានមហាជនអ្នកគាំទ្រលើបណ្ដាញសង្គមចាប់អារម្មណ៍ និង សរសើរខ្លាំងពីសកម្មភាពលើវិស័យសិល្បៈរបស់នាង។
ពិតណាស់ បច្ចុប្បន្ន Melia Constantin ហាក់មានសន្ទុះទីផ្សារសិល្បៈកាន់តែខ្លាំង ដោយនាងបានក្លាយទៅ BA របស់ក្រុមហ៊ុនល្បីៗជាច្រើន ព្រមទាំងពេលនេះ បានបោះជំហានក្នុងវិស័យសម្ដែងយ៉ាងពេញទំហឹង ដោយលេចវត្តមានរបស់នាងក្នុង MV និង ភាពយន្តខ្មែរបន្តបន្ទាប់។
ជាក់ស្ដែង កាលពីមួយរយៈកន្លងទៅ Melia ក្ដោបបានឱកាសសម្ដែងជាតួឯកស្រីជាលើកដំបូងក្នុងខ្សែភាពយន្តខ្នាតធំមួយ គឺរឿង «ប្រវត្តិស្នេហ៍នាងនាថ» ប៉ះជាមួយនឹងតារាសម្ដែងប្រុសមីយ៉ាន់ម៉ា Paing Takhon ដែលភាពយន្តនេះមានសន្ទុះនៃការគាំទ្រខ្លាំង និង ទទួលបានការសរសើរពីស្នាដៃសម្ដែងដ៏មានទេពកោស្យរបស់នាង ព្រមទាំងតួអង្គផ្សេងៗទៀត។
មកដល់ថ្មីៗនេះ អ្វីកាន់តែចាប់អារម្មណ៍ចំពោះ តារាស្រីកូនកាត់ Melia Constantin ខណៈបានឃើញនាងក្ដោបបានតំណែងជាតួឯកស្រីក្នុងភាពយន្តខ្នាតធំមួយទៀតប៉ះជាមួយដៃគូថ្មី គឺជាតារាប្រុសវ័យក្មេងលោក អ៊ឹងហាវ ក្នុងភាពយន្តខ្នាតធំថ្មីមួយមានចំណងជើងថា «កំហឹងធ្មប់» ដែលកំពុងទទួលបានការចាប់អារម្មណ៍ពីមហាជនអ្នកគាំទ្រ និង រង់ចាំទស្សនាស្នាដៃសម្ដែងរបស់អ្នកទាំងពីរឆាប់ៗផងដែរ៕
