អ្នកនាង កែវ នីសា ត្រូវបានមហាជនចាត់ទុកជាសិល្បការិនីរៀមច្បងមួយរូប ដែលមានបទពិសោធច្រើនក្រាស់ក្រែលនៅក្នុងអាជីពសិល្បៈ ដោយកន្លងមក អ្នកនាងមានជំនាញទាំងពិធីការិនី និង សម្ដែង ធ្វើឱ្យមហាជនផ្ទុះការគាំទ្រជាខ្លាំង។
ដ្បិតថាមកដល់បច្ចុប្បន្ន កែវ នីសា ហាក់ស្ងប់ស្ងាត់មិនសូវបង្ហាញមុខក្នុងខ្សែភាពយន្តក៏ពិតមែន ប៉ុន្ដែអ្នកនាងនៅតែពិធីការិនីប្រចាំប៉ុស្ដិ៍ទូរទស្សន៍បាយ័ន។ កន្លងមក កែវ នីសា ពុំសូវបើកបង្ហាញពីជីវិតឯកជនរបស់នាងនៅលើបណ្ដាញសង្គមញឹកញាប់នោះទេ មានតែយូរៗម្ដងប៉ុណ្ណោះ ដែលតារាស្រីរូបនេះ បង្ហោះរូបភាព បង្ហាញពីសកម្មភាពការងារ ឬការចូលរួមកម្មវិធីជួបជុំផ្សេងៗជាមួយសិល្បករដទៃទៀត។
ក្រៅពីរឿងការងារ កែវ នីសា ក៏មិនធ្លាប់បង្ហើបពាក់ព័ន្ធនឹងជីវិតស្នេហាដែរ តែយ៉ាងណា ថ្មីៗនេះ អ្នកគាំទ្រហាក់ចាប់អារម្មណ៍ពីសម្រស់របស់តារាស្រីរូបនេះ ដោយអ្នកនាងបានផុសរូបថតថ្មី ២ សន្លឹកនៅលើគណនីហ្វេសប៊ុក ជាមួយទម្រង់មុខប្លែកខ្លាំងមើលសឹងមិនស្គាល់ បើធៀបនឹងមុខមាត់របស់នាងកាលពីមុន។ មានការលើកឡើងស្រដៀងៗគ្នាថា កែវ នីសា អាយុជ្រេហើយ តែសាច់ឈាម មុខមាត់ នៅតែក្មេងខ្ចីមិនប្រែសោះ៕
