នៅយប់ថ្ងៃទី ១១ ខែកក្កដា ឆ្នាំ ២០២៥ មហាជនអ្នកប្រើប្រាស់បណ្ដាញសង្គម បាននាំគ្នាសម្ដែងក្ដីអាណិតអាសូរទៅលើស្ត្រីពោះធំមួយរូប បន្ទាប់ពីមានគណនីឈ្មោះ Pheaktra Yong បានរៀបរាប់ពីរឿងរ៉ាវរបស់គាត់ថា ៖ «ខ្ញុំទប់ទឹកភ្នែកសឹងមិនជាប់ បងស្រីម្នាក់គាត់ចូលទិញក្រដាសភ្លោះ ១ ដុំ ក្រដាសសើមមួយដុំទាំងយប់ម៉ោង 9 ជាង ស្រាប់តែខ្ញុំសួរគាត់បងទៅណា គាត់ថាមកពេទ្យឈឺពោះសម្រាល ទាំងស្ថានភាពក្បាលពាក់កែវបំភ្លឺផ្លូវ ជិះម៉ូតូអត់ភ្លើង ម៉ូតូធាក់មិនចង់ឆេះទៀត។ រួចក៏សួរគាត់ប្តីបងទៅណាមិចមិនជូនមក គាត់ឆ្លើយទាំងមិនចង់ឆ្លើយថា នៅផ្ទះ។ មិនដឹងថាគ្រួសារបងមានបញ្ហា ឬ មានរវល់អី តែយ៉ាងហោចណាស់ថ្ងៃឆ្លងទន្លេ គួរតែប្តីមកនៅក្បែរ (សុំទោសផងបងដែលថតរូបមិនបានសុំអនុញ្ញាត)»។
បន្ទាប់ពីការបង្ហោះបែបនេះ មានមហាជនជាច្រើនបានសម្ដែងអារម្មណ៍អាណិតអាសូរទៅកាន់ស្ត្រីពោះធំរូបនេះ ខណៈនៅថ្ងៃដដែលតាមរយៈគណនីឈ្មោះ Hun Boren បានបញ្ជាក់ពីស្ថានភាពស្ត្រីពោះធំរូបនេះឱ្យបានដឹងថា ដោយទទួលបានការយកចិត្តទុក្ខដាក់ពីសំណាក់លោកគ្រូ អ្នកគ្រូពេទ្យនៅមណ្ឌលសុខភាពថាឡាបរិវ៉ា់ត់ ស្រ្តីជាម្តាយ និង កូន គឺមានសុខភាពល្អ ដែលបានសម្រាលកូននៅវេលាម៉ោង ២១:៣០ នាទី កូនស្រី ទម្ងន់ 3.5kg ហេីយជាកូនទី ៦ និង កំពុងបន្តតាមដានយ៉ាងយកចិត្តទុក្ខដាក់ពីការថែទាំក្រោយសម្រាល។
តាមប្រភពខាងលើ បានបញ្ជាក់បន្ថែមឱ្យដឹងទៀតថា ស្រ្តីជាម្ដាយមានឈ្មោះ សារិ សុភី អាយុ ២៧ ឆ្នាំ រស់នៅភូមិវាលខ្សាច់ ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង មកដល់ម៉ោងនេះស្វាមី និង សាច់ញាតិគាត់ក៏កំពុងនៅជាមួយគាត់ដែរហេីយ៕
