នៅថ្ងៃទី ១២ ខែមិថុនា ឆ្នាំ ២០២៥ នេះ រដ្ឋបាលរាជធានីភ្នំពេញ បានបើកកិច្ចប្រជុំត្រួតពិនិត្យវឌ្ឍនភាពនៃការត្រៀមរៀបចំបើកសម្ពោធដាក់ឱ្យប្រើប្រាស់ជាផ្លូវការនូវផ្លូវថ្មើរជើងចតុមុខ (Walk Street) ជាមួយអាជ្ញាធរខណ្ឌ កងកម្លាំង និង មន្ទីរពាក់ព័ន្ធ។
តាមរយៈកិច្ចប្រជុំ ឯកឧត្តម ឃួង ស្រេង អភិបាលរាជធានីភ្នំពេញ បានលើកឡើងថា ផ្លូវថ្មើរជើងចតុមុខ (Walk Street) ក្រោយពីបានបើកឱ្យដំណើរការជាបណ្តោះអាសន្ននាប៉ុន្មានខែនេះ បានទទួលការគាំទ្រ និង ពេញនិយមយ៉ាងខ្លាំងពីសំណាក់ប្រជាពលរដ្ឋ និង ភ្ញៀវជាតិ-អន្តរជាតិ។ ទន្ទឹមនឹងនេះ រដ្ឋបាលរាជធានីភ្នំពេញ បានស្នើសុំទៅសម្តេចមហាបវរធិបតី ហ៊ុន ម៉ាណែត ដើម្បីបើកសម្ពោធជាផ្លូវការ ហើយត្រូវបានសម្តេចបវរធិបតីឯកភាព ដោយនឹងធ្វើពិធីសម្ពោធជាផ្លូវការ នាថ្ងៃទី ២១ ខែមិថុនា ឆ្នាំ ២០២៥ ខាងមុខនេះ។
តាមរយៈប្រភពព័ត៌មានបានឱ្យដឹងថា ក្នុងថ្ងៃបើកសម្ពោធដាក់ឱ្យប្រើប្រាស់ជាផ្លូវការផ្លូវថ្មើរជើងចតុមុខ (Walk Street) នេះ រដ្ឋបាលរាជធានីភ្នំពេញ បានរៀបចំឱ្យមានការប្រគំតន្ត្រីខ្នាតធំ ដោយក្រុមហ៊ុនកាឡាក់ស៊ី «GALAXY» អ្នកឧកញ៉ា ឡេង ណាវាត្រា, ការសម្តែងសិល្បៈប្រពៃណី របាំចម្រុះ របស់មន្ទីរវប្បធម៌រាជធានីភ្នំពេញ, ស្តង់លក់ដូរ ជាមួយនឹងការរៀបចំស្តង់ម្ហូបអាហារ ចំនួន ២ ទីតាំង គឺស្តង់ម្ហូបអាហាររបស់ស្ថានទូតប្រទេសឥណ្ឌា និង ស្ថានទូតប្រទេសម៉ាឡេស៊ី ផងដែរ។
សូមរំឭកផងដែរថា ផ្លូវថ្មើរជើងចតុមុខ (Walk Street) ត្រូវបានរដ្ឋបាលរាជធានីភ្នំពេញ ដាក់ឱ្យដំណើរការសាកល្បង កាលពីថ្ងៃទី ១ ខែកុម្ភៈ ឆ្នាំ ២០២៥ នៅរៀងរាល់ថ្ងៃសៅរ៍ និង ថ្ងៃអាទិត្យ ចាប់ពីម៉ោង ១៨៖០០ នាទី រហូតដល់ម៉ោង ២៣៖០០ នាទីយប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ ៩៤) រហូតដល់មុខព្រះបរមរាជវាំង ស្ថិតនៅខណ្ឌដូនពេញ រាជធានីភ្នំពេញ៕
ប្រភព ៖ Fresh News
