វាសនាមើលមិនឃើញ! មុខមាត់ខុសប្រក្រតីព្រោះជំងឺម្យ៉ាង តែអាចក្លាយជាម៉ូឌែល ដើរបង្ហាញម៉ូដឱ្យម៉ាកល្បីលំដាប់អន្តរជាតិ រកលុយបានទាំងខ្ទាស់

មិនមែនទាល់តែមុខស្អាត ទើបអាចក្លាយជាម៉ូឌែលនោះទេ ដូចជានារីជនជាតិអង់គ្លេសម្នាក់នេះ ទោះមុខមាត់ធម្មជាតិនាង ហាក់ខុសប្លែកពីគេទូទៅបន្តិច ដោយមុខធ្លាក់មួយចំហៀង តែនាងត្រូវបានប្រ៊េនសម្លៀកបំពាក់ដ៏ល្បី ជ្រើសរើសធ្វើជាអ្នកដើរម៉ូដសម្រាប់ការបង្ហាញខូឡិកហ្សិនថ្មី។​

ពិតណាស់! នារីរូបនេះមានវ័យទើបតែ ២១ ឆ្នាំ​ មានឈ្មោះថា Nikki Lilly ដែលគេស្គាល់ថា ជាតារាបណ្តាញសង្គម និង ជាអ្នកតស៊ូមតិដ៏មានប្រជាប្រិយភាពមួយរូប។ នាងបានដើរបង្ហាញម៉ូដឱ្យម៉ាក Matières Fécales សម្រាប់ខូឡិកហ្សិន និទាឃរដូវ/រដូវក្តៅឆ្នាំ ២០២៦ (spring/summer 2026) កាលពីថ្ងៃទី ០១ ខែ តុលា នៅក្នុងព្រឹត្តិការណ៍ Paris Fashion Week។ នេះជាលើកដំបូងហើយ ដែលនាងបានបង្ហាញវត្តមានជាអ្នកដើរបង្ហាញម៉ូដនៅលើវិថី runway ហើយវាក៏ធ្វើឱ្យក្តីសុបិនរបស់នាង ក្លាយជាការពិតផងដែរ។​

មុនឈានមកដល់ចំណុចនេះ​ មែនទែនទៅ Nikki Lilly នាងល្បីល្បាញ​រួចមកហើយ គឺល្បីដោយសារតែការនិយាយ​បើក​ចំហ​អំពី មុខហើមធ្លាក់មួយចំហៀងរបស់នាងនេះឯង។ មូលហេតុដែលធ្វើឱ្យមុខនាងទៅជាបែបនេះ ដោយសារនាងជួបបញ្ហាសុខភាពម្យ៉ាង គឺភាពមិនប្រក្រតីនៃសរសៃឈាមខួរក្បាលខ្ពស់ ឬ ហៅថា high-flow craniofacial arteriovenous malformation (AVM) ដែលជាស្ថានភាពវេជ្ជសាស្ត្រមួយដ៏កម្រ៕

ប្រភព៖ PP