ផលិតផលក្នុងស្រុកយើងស្អាតមិនណយទេ! ផលិតផលធម្មជាតិ ធ្វើដោយដៃស្ត្រីខ្មែរ គុណភាពមិនចាញ់ប្រ៊េនល្បីៗ ទីតាំងសិប្បកម្មនៅខេត្តសៀមរាប

បច្ចុប្បន្ន បើទោះផលិតផលក្រៅស្រុកមានការហូរចូលយ៉ាងណាក្តី តែសិប្បកម្មធ្វើដោយដៃ ជាពិសេស ផលិតផលដែលធ្វើឡើងពីធម្មជាតិ និង មិនប៉ះពាល់បរិស្ថាននៅតែទទួលបានការពេញនិយម។ បន្ទាប់ពីកូវីដ-១៩ សង្កេតឃើញថាផលិតផលក្នុងស្រុកចាប់ផ្តើមមានទីផ្សារឡើងវិញជាបណ្តើរៗ ក្នុងនោះសិប្បកម្មបង្កើតផលិតផលពីធម្មជាតិចំនួន ៤ ឃើញថាមានការចាប់អារម្មណ៍ខ្លាំងពីសំណាក់ទេសចរបរទេស។

១. MANAVA

ម៉ាណាវ៉ា ជាម៉ាកផលិតផលក្នុងស្រុកផលិតដោយដៃសុទ្ធសាធ ប្រើវត្ថុធាតុដើម្បីពីធម្មជាតិ១០០% ផ្តៅ និង រពាក់។ កញ្ញា កាឡៃ ចាន់ ជនជាតិហូឡង់ និង លោក ថូ បារំាង ជនជាតិខ្មែរបានផ្តួចផ្តើមអាជីវកម្មនេះឡើង ដោយមានចក្ខុវិស័យអភិវឌ្ឍទៅលើសិប្បកម្មតម្បាញ និង លើកកម្ពស់ជីវភាពរស់នៅរបស់ស្ត្រីមួយចំនួននៅតាមភូមិជនបទខេត្តសៀមរាប។ ផលិតផលប្រកបដោយសិល្បៈ មានដូចជាគ្រឿងលម្អផ្ទះ កងដៃ កាបូប កន្ត្រក គ្រឿងតាក់តែងអំពូល និង សង្ហារិមជាដើម។ ថ្វីបើផលិតផលធ្វើដោយដៃ តែរាល់ម៉ូដនីមួយៗចេញមកទាន់សម័យ និង មានគុណភាពខ្ពស់។ រីឯតម្លៃវិញមួយៗលក់បានរាប់រយដុល្លារ។

២. Graines De Cambodge

គ្រឿងលម្អកាយដូចជា ក្រវិល ខ្សែក ខ្សែដៃ និង ចិញ្ចៀន ត្រូវបានធ្វើឡើងពីគ្រាប់ផ្លែឈើដែលរកបាននៅតាមតំបន់នានាក្នុងប្រទេសកម្ពុជា។  សិប្បកម្មនេះបង្កើតឡើងដោយអ្នកស្រី សំ រ៉ានី ជាអ្នករស់នៅខេត្តសៀមរាប។ អ្នកស្រីបានប្រើគ្រាប់ផ្លែឈើរហូតដល់ទៅ ២០ មុខខុសៗគ្នា ចាក់ដោតក្រងចេញជាម៉ូដបែបទាន់សម័យ រីឯលក្ខណៈពិសេស ពណ៌នៃគ្រឿងនីមួយៗ សុទ្ធតែជាពណ៌ធម្មជាតិគ្មានការជ្រលក់ពណ៌ឡើយ។ ផលិតផលនេះមានទីផ្សារទាំងក្នុង និង ក្រៅប្រទេស ជាពិសេសភ្ញៀវនៅខាងហុងកុង និង សហរដ្ឋអាមេរិក។

៣. Claycult Cambodia

គ្រឿងអលង្ការបង្កើតចេញពីភក់ហាក់មានលក្ខណៈពិសេសប្លែកដោយឡែក មានពណ៌ មានភាពភ្លឺរលោង និង មើលទៅស្រស់បំព្រងទាក់ភ្នែកបំផុត។ សិប្បកម្មធ្វើគ្រឿងលម្អកាយសេរ៉ាមិចនេះ មានទីតាំងនៅខេត្តសៀមរាប និង បានបង្កើតហាងលក់ដល់ទៅបីហាង។ ម្ចាស់បង្កើតសិប្បកម្មជាជនជាតិអូស្ត្រាលី មានជំនាញខាងសេរ៉ាមិច ឯអ្នកផលិតសុទ្ធតែជាជនជាតិខ្មែរ និង វ័យក្មេង រីឯម៉ូដ ពួកគេដកស្រង់ចេញពីអ្វីៗនៅជុំវិញខ្លួន ជាពិសេស ក្បាច់ពីប្រាសាទអង្គរវត្ត។

៤. Samatoa Lotus Textiles

ពិតជាមិននឹកស្មាន សរសៃដែលកាច់ចេញពីដើមឈូក អាចវេញត្របាញ់ធ្វើជាអំបោះត្បាញចេញជាក្រណាត់មានគុណភាពខ្ពស់លក់បានតម្លៃមិនធម្មតា។ ថ្វីបើសិប្បកម្មនេះមានទីតាំងនៅខេត្តសៀមរាប តែទីផ្សារលក់កំពុងមានការចាប់អារម្មណ៍ទូទាំងពិភពលោក។ ជាក់ស្តែង កាលពីឆ្នាំ ២០១២ ផលិតផលក្រណាត់ឈូកនេះ ទទួលបានពានរង្វាន់ពីអង្គការយូណេស្កូ ជាផលិតផលធ្វើដោយដៃ ដែលល្អបំផុតនៅអាស៊ីអាគ្នេយ៍៕