ម្ដងម្កាល នៅតាមបណ្ដាញសង្គមហ្វេសប៊ុក និង TikTok អ្នកប្រើប្រាស់តែងនិយមឃើញការផ្សព្វផ្សាយនូវឧបករណ៍មួយប្រភេទ ដោយអ្នកលក់អនឡាញអះអាងក្ដែងៗលើប្រព័ន្ធផ្សព្វផ្សាយថា បើទិញប្រើហើយអាចជួយកាត់បន្ថយការប្រើប្រាស់អគ្គិសនី។
ទាក់ទិនទៅនឹងករណីនេះ តាមរយៈប្រធានអាជ្ញាធរអគ្គិសនីកម្ពុជា លោក យឹម វិសិដ្ឋ បានមានប្រសាសន៍ប្រាប់សារព័ត៌មានក្នុងស្រុក នៅថ្ងៃទី ២៨ ខែវិច្ឆិកា ឆ្នាំ ២០២៥ នេះ ឱ្យបានដឹងថា មកដល់ពេលនេះ នៅតែសង្កេតឃើញ មានលក់ឧបករណ៍មួយចំនួនតាមអនឡាញ ដែលបានផ្សព្វផ្សាយបោកប្រាស់ថា ការប្រើឧបករណ៍នោះ ភ្ជាប់ជាមួយបណ្តាញអគ្គិសនីក្នុងផ្ទះ នឹងជួយកាត់បន្ថយការប្រើប្រាស់អគ្គិសនី។
ចំពោះរឿងនេះ អាជ្ញាធរអគ្គិសនីកម្ពុជា បានឆ្លើយតបច្បាស់ៗថា ឧបករណ៍ទាំងនោះ ពុំបានជួយកាត់បន្ថយការប្រើប្រាស់អគ្គិសនី ដូចការផ្សព្វផ្សាយនោះទេ ដូច្នេះសូមកុំចាញ់បោកទិញយកមកប្រើ។ អាជ្ញាធរអគ្គិសនីកម្ពុជា នឹងបង្ហាញវីដេអូនៃការពិសោធជាក់ស្តែងជូននៅពេលឆាប់ៗ៕
ប្រភព ៖ Fresh News
