ដូចមហាជនបានជ្រាប កាលពីឆ្នាំ ២០២៣ ឯកឧត្តម នេត្រ ភក្រ្តា ត្រូវបានព្រះមហាក្សត្រត្រាស់បង្គាប់តែងតាំង ជារដ្ឋមន្រ្តីក្រសួងព័ត៌មាន សម្រាប់នីតិកាលទី ៧ នៃរដ្ឋសភា។ មុនកាន់តំណែងនេះ ឯកឧត្តមរដ្ឋមន្ត្រី បានប្រឡូកការងារនៅក្នុងវិស័យប្រព័ន្ធផ្សព្វផ្សាយ និង ទំនាក់ទំនង អស់រយៈពេលប្រមាណ ២៣ ឆ្នាំ។ បេសកកម្មរបស់ឯកឧត្តមរដ្ឋមន្ត្រី គឺធ្វើទំនើបកម្មទិដ្ឋភាពប្រព័ន្ធផ្សព្វផ្សាយរបស់ប្រទេសកម្ពុជា ពង្រឹងបណ្តាញព័ត៌មានសាធារណៈ និង ប្រយុទ្ធប្រឆាំងនឹងបញ្ហារីករាលដាលនៃព័ត៌មានក្លែងក្លាយ។
រម្លឹកអំពីប្រវត្តិមុនក្លាយជារដ្ឋមន្ត្រី ដើមឡើយ ឯកឧត្តម នេត្រ ភក្រ្តា មិនបានធំធាត់ចេញពីគ្រួសារធូរធារនោះទេ ពោល ឯកឧត្តមជាកូនកសិករ និង បានឡើងមករៀននៅទីក្រុងភ្នំពេញ។ នៅក្នុងបទសម្ភាសជាមួយសារព័ត៌មានអន្តរជាតិ Prestige ក្រោយបញ្ចប់ការសិក្សាថ្នាក់វិទ្យាល័យ ឯកឧត្តមបានឡើងមកបន្តការសិក្សានៅទីក្រុងភ្នំពេញ ដោយស្នាក់អាស្រ័យនៅវត្តអារាមអស់រយៈពេល ១០ ឆ្នាំ។
ឯកឧត្តមមានប្រសាសន៍ថា៖ «វត្តបានក្លាយជាជម្រករបស់ខ្ញុំ វាជាទំនៀមទម្លាប់មួយសម្រាប់វត្ត ដែលជួយដល់សិស្សដូចជាខ្ញុំ ដែលមកពីទីជនបទដើម្បីសិក្សា»។ ជីវិតរស់នៅអំឡុងនោះ ក៏ជាផ្នែកមួយបណ្តុះបណ្តាលឱ្យឯកឧត្តមបានយល់ដឹងអំពីភាពឯករាជ្យ និង ការតស៊ូផងដែរ។ ការប្រឈមពីមួយដំណាក់កាលទៅមួយដំណាក់កាល ជារឿយៗ ឯកឧត្តមតែងនឹកដល់ពាក្យសម្តីរបស់ឪពុកមួយឃ្លាថា៖ «កូន! ចំណេះដឹង គឺជាទ្រព្យសម្បត្តិពិតរបស់កូន វាគឺជាអ្វីដែលគ្មាននរណាម្នាក់អាចយកពីកូនបានឡើយ។»
នៅពីតូចឪពុករបស់ឯកឧត្តម តែងមានទម្លាប់យកកាសែតពីផ្សារមកផ្ទះ ដែលនេះបានបណ្តុះឱ្យឯកឧត្តមស្រលាញ់ខាងវិស័យសារព័ត៌មានតាំងតែពីកុមារ។ ឯកឧត្តមនិយាយថា ការអានកាសែតទាំងនោះ បានជំរុញឱ្យឯកឧត្តមចូលចិត្តការនិទានរឿង និង ព័ត៌មាន។ ចំណង់ចំណូលចិត្តនេះ បាននាំផ្លូវឱ្យឯកឧត្តមបន្តការសិក្សាដល់សាកលវិទ្យាល័យ ដោយចាប់ជំនាញខាងសារព័ត៌មាន ជាជំនាញមានទីផ្សារការងារខ្ពស់។ ការងារដំបូងដែលឯកឧត្តមបានចាប់ផ្តើម គឺនៅទូរទស្សន៍ជាតិកម្ពុជា ជាកន្លែងដែលឯកឧត្តមទទួលបានបទពិសោធយ៉ាងច្រើនក្នុងការសរសេរកម្មវិធីពីរភាសា(bilingual programming) ហើយបន្ទាប់មក ឯកឧត្តមបានបន្តការងារយ៉ាងសកម្មក្នុងវិស័យប្រព័ន្ធផ្សព្វផ្សាយ និង ទំនាក់ទំនង ពីកន្លែងមួយទៅកន្លែងមួយ រហូតឡើងជារដ្ឋមន្រ្តីក្រសួងព័ត៌មានដូចសព្វថ្ងៃ៕
