រយៈពេលជិត ១ ឆ្នាំហើយ ដែលតារាសម្ដែងស្រី ដួង ម៉ានិច និង Lyderzz បានក្លាយជាសា្វមីភរិយាតាមប្រពៃណី ចាប់ដៃគ្នាសាងគ្រួសារយ៉ាងមានសុភមង្គល ដែលស្ដែងពីក្ដីសុខក្នុងជីវិតប្ដីប្រពន្ធយ៉ាងសាមញ្ញភាគច្រើនរស់នៅឯជនបទ។
ពិតណាស់ បច្ចុប្បន្ន ដួង ម៉ានិច និង Lyderzz បានបង្ហាញពីសកម្មភាពរៀបចំជីវិតរស់នៅយ៉ាងសាមញ្ញមួយបែបស្រុកស្រែចម្ការ ដែលបានសាងសង់ផ្ទះលម្ហែ និង ដាំដំណាំបន្លែផ្លែឈឺក្បែរជើងភ្នំយ៉ាងស្រស់ស្រាយ ត្រៀមទៅសាងជីវិតគ្រួសាររបស់អ្នកទាំងពីនៅទីនោះ។
មិនត្រឹមតែប្រើជីវិតរស់នៅជនបទយ៉ាងសាមញ្ញៗនោះទេ មួយរយៈនេះ ប្ដីប្រពន្ធមួយគូនេះ តែងបង្ហាញសកម្មភាពធ្វើបុណ្យដាក់ទាន និង តាំងចិត្តរៀនព្រះធម៌ពេញដោយសេចក្ដីជ្រះថ្លាទៀតផង។
លើសពីនេះ អ្វីកាន់តែចាប់អារម្មណ៍ និង ស្ងើចសរសើរពីប្ដីប្រពន្ធមួយគូនេះទៀត ខណៈថ្មីៗនេះ បានឃើញអ្នកនាង ដួង ម៉ានិច បង្ហាញសកម្មភាពធ្វើដំណើរទៅក្រៅប្រទេស គឺប្រទេសឥណ្ឌា ដើម្បីបំពេញបុណ្យសាងកុសល ខណៈលោក Lyderzz បានសាងផ្នួសជាព្រះសង្ឃជាលើកទី ២ រីឯនាងក៏បានកាត់សក់ស្លៀកសជាជីព្រហ្ម ដើរលើផ្លូវព្រះធម៌ពេញដោយក្ដីសុខក្នុងចិត្តផងដែរ។
ជាមួយគ្នានោះ ដួង ម៉ានិច ក៏បានបង្ហោះរៀបរាប់ភ្ជាប់ជាមួយរូបភាព ដែលកំពុងបំពេញបុណ្យសាងកុសលនៅឯក្រៅប្រទេសថា ៖ «ម៉ាក់និច នៅក្នុងវិស័យសិល្បៈយូរឆ្នាំដែរហើយ ដោយចិត្តស្រឡាញ់ តែប៉ុន្មានឆ្នាំចុងក្រោយនេះ ម៉ាក់និច បានដើរបំពេញបុណ្យបន្ថែម សម្រាប់ថ្ងៃមុខក៏ដូចជាជាតិមុខៗ ហើយប៉ុន្មានថ្ងៃនេះ ម៉ាក់និច បាននិមន្តព្រះអង្គម្ចាស់ ឆាត និង ម៉ែ រី មកថ្វាយបង្គំព្រះសម្មាសម្ពុទ្ធនៅដែនដី ពុទ្ធភូមិ មកដល់ប៉ុន្មានថ្ងែនេះ ពិតជាមានសេចក្តីសោមនស្សរីករាយខ្លាំងណាស់។ លើកទីមួយហើយ ដែលបានមកដល់ដែនដីពុទ្ធភូមិ សូមប្រគេនបុណ្យ និង ជូនបុណ្យដល់ ព្រះអង្គម្ចាស់ គ្រប់អង្គទាំងអស់ ដូចជាពុកម៉ែបងប្អូន ទាំងអស់ សូមបានចំណែកបុណ្យស្មើៗនឹង ខ្ញុំព្រះករុណា នាងខ្ញុំ»៕
