និយាយពីស្រីស្អាត Melia និង តារាប្រុសរូបសង្ហា អ៊ឹងហាវ មួយរយៈថ្មីកន្លងទៅនេះ ត្រូវបានមហាជនអ្នកគាំទ្រចាប់អារម្មណ៍តាមដានខ្លាំង ក្រោយពីបានឃើញតារាប្រុសស្រីគូនេះ ចាប់ដៃរួមការងារជាមួយគ្នា ដែលបានប៉ះគ្នាជាតួឯកប្រុសស្រីក្នុងភាពយន្តខ្នាតធំមួយ ព្រមទាំងថតផ្សព្វផ្សាយផលិតផលផ្សេងៗជាមួយគ្នាបន្តបន្ទាប់។
ពិតណាស់ ស្របពេលស្រីស្អាតប្រុសសង្ហាមួយគូនេះ មានសកម្មភាពការងារជាមួយគ្នា តែងត្រូវបានមហាជនអ្នកគាំទ្រចាប់អារម្មណ៍សរសើរពីស្នាដៃសម្ដែងរបស់អ្នកទាំងពីរជាដៃគូដ៏ស័ក្តិសម ដែលសុទ្ធសឹងតែជាតារាប្រុសស្រីមានសមត្ថភាព និង សម្រស់ស្រស់ស្អាតស្រស់សង្ហាដូចគ្នា។
ជាក់ស្ដែង ថ្មីៗនេះ អ្វីរឹតតែធ្វើឱ្យអ្នកគាំទ្រចាប់អារម្មណ៍ខ្លាំងទៀត ក្រោយពីបានឃើញស្រីស្អាត Melia និង លោក អ៊ឹង ហាវ បានចាប់ដៃគ្នាថត MV ចម្រៀងមួយបទ «More than a love song» ច្រៀងដោយតារាប្រុសរូបនេះ ដែលអ្នកទាំងពីរបានសម្ដែងជាគូស្នេហ៍យ៉ាងផ្អែមល្ហែមលើទឹកដីប្រាសាទអង្គរវត្ត។ ជាមួយគ្នានោះ វីដេអូនៃសកម្មភាព ក៏ដូចជារូបភាពនៅក្រៅឆាកដ៏ផ្អែមល្ហែមរបស់តារាប្រុសស្រីមួយគូនេះ កំពុងត្រូវបានអ្នកគាំទ្រសរសើរពីភាពស្រស់ស្អាតស័ក្តិសមរបស់អ្នកទាំងពីរ និង មានភាពស្និទ្ធស្នាលផ្អែមល្ហែមខ្លាំងប្រៀបដូចគូស្នេហ៍មែនទែនអ៊ីចឹង៕
