នៅក្នុងចង្កោមសិល្បៈ គឹម សីហា និង គង់ ចាន់ស្រីមុំ គឺជាគូស្នេហ៍តារាសិល្បៈដ៏មានប្រជាប្រិយភាព ស្រស់ស្អាតស័ក្តិសម ដែលធ្វើឱ្យគ្រប់គ្នារមែងតាមដានជីវិតរបស់ពួកគេតាំងពីចាប់ផ្តើមបង្ហាញខ្លួនលើវិថីសិល្បៈ រហូតដល់សាងគ្រួសារយ៉ាងមានសុភមង្គល។ រឭកកប្រវត្តិស្នេហ៍ អ្នកទាំងពីរបានចាត់ថ្ងៃ Valentine’s Day ឬ ទិវាបុណ្យនៃក្តីស្រលាញ់ គឺជាថ្ងៃកំណើតស្នេហ៍តែម្តង។
មុនឈានដល់ថ្ងៃអាពាហ៍ពិពាហ៍ គឹម សីហា និង គង់ ចាន់ស្រីមុំ បានសាងស្នេហ៍រយៈពេល ៨ ឆ្នាំ ពោលតាំងពីមុនចូលប្រលូកសិល្បៈម្ល៉េះ។ សីហា និង ស្រីមុំ បានស្គាល់គ្នាអំឡុងពេលកំពុងរៀននៅវិទ្យាល័យ តែអ្នកទាំងពីររៀននៅសាលាខុសគ្នា។ សីហា បានមកជួប ស្រីមុំ នៅសាលាចតុមុខ គ្រានោះគ្រាន់តែក្រឡេកឃើញភ្លាម លោកក៏ចាប់ចិត្តស្រលាញ់ភ្លែត ព្រមទាំងហ៊ានសាសងទាំងដែលខ្លួនមានគូស្នេហ៍រួចទៅហើយ។
ដោយដឹងថា សីហា មានគូស្នេហ៍ ស្រីមុំ បានព្យាយាមផ្តាច់ការទាក់ទង ប្តូរលេខទូរស័ព្ទ ព្រោះខ្លាចថាមានបញ្ហាទៅថ្ងៃក្រោយ។ រយៈពេលកន្លងផុតទៅ សីហា បានចូលប្រកួតក្នុងកម្មវិធី Freshie Girls and Boys ដោយទទួលបានចំណាត់ថ្នាក់លេខ ២។ បើទោះលោកមានសង្សារបែកពីមួយទៅមួយបន្តបន្ទាប់ តែលោកនៅតែនឹកនាដល់ ស្រីមុំ ជានិច្ច។ មិនបានប៉ុន្មាន សីហា បានឱ្យមិត្តរបស់ខ្លួនសុំលេខទូរស័ព្ទរបស់ ស្រីមុំ ផ្តើមការទាក់ទងទៅនាង ដោយរយៈពេលប្រហែល ៤ ខែ អ្នកទាំងពីរក៏បានត្រូវគ្នាវិញ សន្មតក្លាយជាគូសង្សារនៅក្នុងថ្ងៃ Valentine’s Day ក្នុងឆ្នាំ ២០០៨។
ស្រីមុំ រឭកថា អ្វីដែលនាងចងចាំមិនភ្លេចនៅថ្ងៃនោះគឺ សីហា បានឱ្យកាដូធុងសំរាមតុក្កតា Hello Kitty ដែលមានដាក់ស្ករសូកូឡាពណ៌ស ខ្មៅ និង មានបិតផ្កាកុលាបពីលើយ៉ាងស្រស់ស្អាត ព្រមជាមួយបាច់តុក្កតាផងដែរ។ ពីពេលនោះមក អ្នកទាំងពីរបានក្លាយជាគូស្នេហ៍ផ្អែមល្ហែម ហើយ ស្រីមុំ ក៏ត្រូវបាន សីហា ជំរុញចូលវិថីសិល្បៈផងដែរ។ អ្នកទាំងពីរបានចាប់ដៃគ្នាបង្កើតអាជីវកម្មជាបន្តបន្ទាប់ ដែលរហូតមកដល់ពេលបច្ចុប្បន្នរួមមាន ផលិតផលតុបតែងមុខ រក្សាសម្រស់ ទឹកអប់ សម្លៀកបំពាក់ និង ភោជនីយដ្ឋានជាដើម៕
