មុនក្លាយជាសេដ្ឋីវាល់លាន អ្នកឧកញ៉ា គិត ម៉េង ក៏មិនខុសពីអ្នកជោគជ័យជាច្រើន ដែលសុទ្ធសឹងឆ្លងកាត់ការប្រឈម ឬបរាជ័យនៅក្នុងការរកស៊ី។ ដើម្បីលើកទឹកចិត្ត ក៏ដូចជាចែករំលែកបទពិសោធទៅកាន់ អ្នកជាសហគ្រិន ជាអ្នកគ្រប់គ្រង ឬកំពុងឆ្លងកាត់ដំណើរជីវិតដែលមានទ្បើងមានចុះ លោកបានសរសេររៀបរាប់បង្ហោះនៅលើបណ្តាញសង្គមដូចខាងក្រោម៖
«តើអ្នកធ្លាប់ដើរដល់ផ្លូវបំបែកមួយដែលអ្វីៗគ្រប់យ៉ាងហាក់មិនសម្រេចដូចបំណងដែរឬទេ? ខ្ញុំផ្ទាល់ធ្លាប់ឆ្លងកាត់ចំណុចនេះ។
អំទ្បុងឆ្នាំដំបូងៗនៃការបង្កើតធុរកិច្ចរបស់ខ្ញុំ ខ្ញុំបានឆ្លងកាត់ពេលវេលាមួយដែលកិច្ចព្រមព្រៀងសំខាន់មួយមិនបានសម្រេចដូចការគ្រោងទុក។ ម្ចាស់អាជីវកម្មទាំងអស់សុទ្ធតែជួបប្រទះបញ្ហាប្រឈម ឬបរាជ័យនៅចំណុចណាមួយ។ បរាជ័យគឺជាផ្នែកមួយមិនអាចចៀសផុតក្នុងដំណើរការមុខជំនួញ។ បរាជ័យមិនគ្រាន់តែធ្វើឱ្យយើងខកចិត្តប៉ុណ្ណោះទេ ប៉ុន្តែក៏បំផ្លាញអារម្មណ៍យើងផងដែរ។ ខ្ញុំគេងមិនលក់នាពេលរាត្រី ខ្ញុំបានបាត់បង់ទំនុកចិត្តលើខ្លួនឯង ហើយមានអារម្មណ៍មិនច្បាស់លាស់អស់មួយរយៈពេលចំពោះទិសដៅរបស់ខ្ញុំដែលត្រូវបន្តទៅមុខ។
ប៉ុន្តែ បន្ទាប់មក ខ្ញុំក៏បានយល់ដឹងថា រាល់បុគ្គលជោគជ័យដែលខ្ញុំស្ងើចសរសើរ សុទ្ធតែបានឆ្លងកាត់ពេលវេលាលំបាកបែបនេះ ហើយអ្នកទាំងនោះមិនបានបោះបង់គោលដៅរបស់ពួកគេទ្បើយ។ ពួកគេបានប្រែក្លាយគ្រាលំបាកទាំងនោះ ដោយធ្វើឱ្យខ្លួនពួកគេកាន់តែខ្លាំងរឹងមាំ។
ដូច្នេះហើយ ខ្ញុំក៏សម្រេចចិត្តធ្វើដូចពួកគេ។ ជំនួសឱ្យការមើលឃើញបរាជ័យថាជាបទពិសោធព្រឺព្រួច ខ្ញុំបានរៀនយកភាពបរាជ័យ ធ្វើជាមតិស្ថាបនា ហើយសួរខ្លួនឯងថា “តើខ្ញុំខកខានមិនបានធ្វើអ្វីខ្លះ? ហេតុអ្វីបានជាបរាជ័យនោះកើតឡើង? ហើយសំខាន់បំផុតនោះ តើខ្ញុំអាចធ្វើអ្វីឱ្យប្រសើរជាងនេះ?” បរាជ័យទាំងនោះមិនត្រឹមតែផ្តល់ឱ្យខ្ញុំនូវមេរៀនដ៏មានតម្លៃប៉ុណ្ណោះទេ ប៉ុន្តែក៏បានផ្តល់ឱកាសល្អដល់ខ្ញុំក្នុងការបង្កើតភាពជាដៃគូពាណិជ្ជកម្ម និង សម្រួចដំណើរការក្រុមហ៊ុនខ្ញុំ គឺក្រុមហ៊ុន រ៉ូយ៉ាល់ គ្រុប ឱ្យក្លាយទៅជាក្រុមហ៊ុនមួយដែលកំពុងមានវឌ្ឍនភាពដូចសព្វថ្ងៃនេះ។
អ្វីដែលជារឿងពិតគ្មាននរណាម្នាក់ប្រាប់អ្នកនោះគឺ ភាពជោគជ័យមិនអាចកើតទ្បើងដោយការគេចពី បញ្ហាប្រឈមនោះទេ។ ភាពជោគជ័យបានមកពីការហ៊ានប្រឈមមុខជាមួយនឹងបញ្ហា ហើយជម្នះបញ្ហាប្រឈមទាំងនោះ។ រាល់បញ្ហាប្រឈមដែលអ្នកជួប គឺជាមេរៀនដែលរង់ចាំអ្នក ដើម្បីឱ្យអ្នករៀនពីវា ឱ្យអ្នកផ្លាស់ប្តូរខ្លួនអ្នក និង ឱ្យអ្នករីកចម្រើនទៅមុខ។
មិនថាអ្នកជាសហគ្រិន ជាអ្នកគ្រប់គ្រង ឬកំពុងឆ្លងកាត់ដំណើរជីវិតដែលមានទ្បើងមានចុះនោះទេ សូមដឹងពីចំណុចនេះ៖ បញ្ហាប្រឈមមិនមែនជារបាំងរារាំងដំណើរអ្នកនោះទេ។ វាជាកាលានុវត្តភាពនាំអ្នកឆ្ពោះទៅភាពជោគជ័យ។ ដូច្នេះ អ្នកត្រូវពុះពារជម្នះឧបសគ្គ និង ស្វែងរកឱកាសល្អនៅពេលទន្ទឹមគ្នានេះ។
ហេតុដូចនេះ នៅពេលដែលអ្នកជួបការលំបាក ឬបញ្ហាប្រឈមទៅថ្ងៃមុខ សូមសួរខ្លួនឯងថា “ការលំបាកនេះកំពុងបង្រៀនអ្វីដល់ខ្ញុំ?” ពីព្រោះនៅក្នុងមេរៀនដែលមានតម្លៃនេះ បង្ហាញអ្នកនូវឱកាសដ៏ធំមួយ ដើម្បីឱ្យអ្នកទទួលបានជោគជ័យ។
សូមចែករំលែកពីរបៀប ដែលអ្នកបានជម្នះបញ្ហាប្រឈមក្នុងពេលវេលាណាមួយ ដោយបានប្រែក្លាយវាទៅជាជោគជ័យ ហើយសូមចូលរួមបំផុសគំនិតគ្នាឱ្យធ្វើបែបនេះ!»៕
