បច្ចុប្បន្ន បើលើកយកតារាចម្រៀងរ៉េប និង R&B ដែលទទួលបានការគាំទ្រខ្លាំងពីសំណាក់មហាជននោះ លោក ទេព ពិសិដ្ឋ ក៏ត្រូវបានរាប់បញ្ជូល ជាតារាចម្រៀងរ៉េប និង R&B កំពុងមានប្រជាប្រិយភាពខ្លាំង ដោយរាល់បទចម្រៀងរបស់លោកចេញមួយបទៗផ្ទុះការគាំទ្រខ្លាំង។
លោក ទេព ពិសិដ្ឋ ចាប់ផ្តើមផ្ទុះប្រជាប្រិយភាពខ្លាំង ក្រោយពីចេញបទចម្រៀងមានចំណងជើងថា «20’OUTNOW» និង បទចម្រៀងជាច្រើនទៀត។ ក្នុងនោះ បទចម្រៀងចុងក្រោយ ដែលលោកទើបតែចេញនៅដើមខែកុម្ភៈ ឆ្នាំ ២០២៥ នេះ មានចំណងជើងថា «ភក្តីស្នេហ៍» បានប្រមាណ ១ សប្តាហ៍ ប៉ុណ្ណោះ បទនេះក៏ទទួលបានចំណាត់ថ្នាក់ 3rd Trending ក្នុង Youtube មានការស្តាប់ច្រើនក្នុងប្រទេសកម្ពុជា។
យ៉ាងណាមិញ អ្វីដែលកំពុងធ្វើឱ្យអ្នកគាំទ្រមិនសរសើរមិនបានដល់ លោក ទេព ពិសិដ្ឋ នោះ ក៏ព្រោះតែរយៈពេល ៦ ឆ្នាំ លើវិថីសិល្បៈ តារាចម្រៀងរ៉េប និង R&B វ័យ ២១ ឆ្នាំ រូបនេះ បានអភិវឌ្ឍន៍ខ្លួន ផ្លាស់ប្តូរស្ទីលទាំងស្រុង ពីតារាចម្រៀង Pop ក្លាយទៅជាតារាចម្រៀងរ៉េប និង R&B។
កាលនោះគេចាំបានថា លោក ទេព ពិសិដ្ឋ បានក្លាយជាម្ចាស់ពានកម្មវិធីប្រឡងចម្រៀងកុមារ The Voice Kids Cambodia រដូវកាលទី ២ និង បានក្លាយជាតារាចម្រៀងប្រចាំផលិតកម្មរស្មីហង្សមាសអំឡុងពេលអាយុ ១៤ ឆ្នាំ។ ក្រោយមក លោក ទេព ពិសិដ្ឋ ក៏បានផលិតបទចម្រៀងបែបមនោសញ្ចេតនា លាយនឹងញាក់កន្ត្រាក់អារម្មណ៍ខ្លះៗដែរ។
ដោយឡែក រយៈពេល ៣ ឆ្នាំ ចុងក្រោយនេះ លោក ទេព ពិសិដ្ឋ បានប្តូរស្ទីលនៃការច្រៀងក្លាយជាជាតារាចម្រៀងរ៉េប និង R&B ព្រមទាំងជាផលិតករ និពន្ធទំនុកភ្លេង ទំនុកច្រៀង ដោយខ្លួនឯងទៀតផង៕
