ឆ្នាំនេះកម្ពុជានឹងកាន់តែលេចធ្លោនៅលើឆាកអន្តរជាតិ ដោយសារបេក្ខភាពតំណាងឱ្យប្រទេស សុទ្ធសឹងតែជាបុគ្គលមានទាំងរូបសម្រស់ សមត្ថភាព និង ចំណេះដឹង។ ជាក់ស្តែង ដូចថ្មីៗនេះ លោក ជា រ៉េយម៉ុន (Raymond Chear) ដែលគ្រប់គ្នាស្គាល់ជាតារាសម្តែង និង ពិធីករពហុភាសា លោកបានបង្ហោះប្រកាសនៅលើគណនីហ្វេសប៊ុករបស់លោក ដែលលោកត្រលប់មកវិញ ជាបេក្ខភាព Mr World Cambodia 2025 តំណាងឱ្យប្រទេសកម្ពុជា លើវេទិកាកម្មវិធីប្រកួតបុរសឯកពិភពលោក Mr World 2025។
ជាបេក្ខភាពតំណាងឱ្យកម្ពុជាដ៏ស័ក្តិសម ក្រៅពីរូបរាងសង្ហាហើយនោះ លោក ជា រ៉េយម៉ុន ក៏មានសមត្ថភាព និង ចំណេះដឹងមិនធម្មតាផងដែរ។ បេក្ខភាពកម្ពស់ ១,៧៩ ម៉ែត្ររូបនេះ សព្វថ្ងៃជាគ្រូស្ម័គ្រចិត្តបង្រៀនភាសា និង បានបញ្ចប់ថ្នាក់បរិញ្ញាបត្រ អង់គ្លេស និង ចិន នៅវិទ្យាស្ថាន IFL។ ជាងនេះទៅទៀត លោកអាចនិយាយបានរហូតដល់ ៥ ភាសាគឺ ខ្មែរ អង់គ្លេស ចិន កាតាំង និង ជប៉ុន។ ពេលទំនេរ លោកចូលចិត្តគូរគំនូរ និង ច្នៃម៉ូដ។ កន្លងមកលោកក៏មានតំណែងជា Mister Glam International Humanity 2022 និង Mister Glam Cambodia 2022 ផងដែរ។
ទន្ទឹមនឹងការបង្ហោះនេះ មហាជន ជាពិសេស អ្នកគាំទ្របានចូលទៅខមមិនអបអរលោកជាហូរហែ និង ខ្លះទៀតបាន Share បន្តលើកឡើងថា លោកពិតជាបេក្ខភាពតំណាងប្រទេសដ៏ស័ក្តិសម ទាំងបុគ្គលិកលក្ខណៈ និង ចំណេះដឹងពិតជាមិនអាចកាត់ថ្លៃបាន។ លោកជាមនុស្សរួសរាយជាមួយស្នាមញញឹមដ៏មានមន្តស្នេហ៍។ សម្រាប់ការប្រកួត លោកនឹងត្រៀមចេញទៅនៅចុងឆ្នាំ ២០២៥ នេះ៕
