លោក លូ ម៉េង គឺជាអ្នកជំនួញ និង ជាចុងភៅដ៏ល្បីឈ្មោះមួយរូបនៅកម្ពុជា។ លោកជាស្ថាបនិក និង ជានាយកប្រតិបត្តិក្រុមហ៊ុនបដិសណ្ឋារកិច្ច Almond Hospitality Group ដែលមានភោជនីយដ្ឋាន សណ្ឋាគារ និង ភ្នាក់ងាផ្តល់សេវាកម្មម្ហូបអាហារ និង ភេសជ្ជ ដូចជា៖ 𝗬𝗶 𝗦𝗮𝗻𝗴 𝗖𝗵𝗶𝗻𝗲𝘀𝗲 𝗥𝗲𝘀𝘁𝗮𝘂𝗿𝗮𝗻𝘁𝘀, 𝗦𝗲𝘃𝗲𝗻𝘀𝗲𝗮 𝗦𝗲𝗮𝗳𝗼𝗼𝗱 𝗥𝗲𝘀𝘁𝗮𝘂𝗿𝗮𝗻𝘁, 𝗨𝘆 𝗞𝘂𝘆𝘁𝗲𝗮𝘃 𝗥𝗲𝘀𝘁𝗮𝘂𝗿𝗮𝗻𝘁, 𝗪𝗼𝗿𝗹𝗱 𝗗𝗶𝗻𝗶𝗻𝗴 𝗥𝗲𝘀𝘁𝗮𝘂𝗿𝗮𝗻𝘁, 𝗔𝗹𝗺𝗼𝗻𝗱 𝗛𝗼𝘁𝗲𝗹 𝗦𝗼𝘁𝗵𝗲𝗮𝗿𝗼𝘀, 𝗔𝗹𝗺𝗼𝗻𝗱 𝗛𝗼𝘁𝗲𝗹 𝗕𝗮𝘀𝘀𝗮𝗰 𝗥𝗶𝘃𝗲𝗿, 𝗪𝗼𝗿𝗹𝗱 𝗗𝗶𝗻𝗶𝗻𝗴 𝗖𝗮𝘁𝗲𝗿𝗶𝗻𝗴 𝗦𝗲𝗿𝘃𝗶𝗰𝗲 និង 𝗟𝘂𝘂𝗺𝗲𝗻𝗴 𝗖𝗼𝗳𝗳𝗲𝗲។
បន្ទាប់ពីបញ្ចប់ការសិក្សាបរិញ្ញាបត្រផ្នែកគ្រប់គ្រងទេសចរណ៍ និង បដិសណ្ឋារកិច្ចអន្តរជាតិ ពីសាកលវិទ្យាល័យ Bangkok University លោក លូ ម៉េង បានចាប់ផ្តើមដំណើររុករក និង អភិវឌ្ឍន៍ជំនាញរយៈពេលមួយទសវត្សរ៍នៅបដិសណ្ឋារកិច្ចអន្តរជាតិ។ លោកបានត្រលប់មកកម្ពុជាទឹកដីកំណើត និង ចាប់ផ្តើមអាជីពជាចុងភៅ ដោយផ្តោតប្រើប្រាស់បទពិសោធទាំងប៉ុន្មានដែលលោកមាន។ លោកបានលើកឡើងថា៖ «ខ្ញុំមានឱកាសដ៏ល្អក្នុងការចែករំលែកមុខម្ហូបខ្មែរជាមួយមនុស្សរាល់គ្នា រសជាតិដ៏ប្លែកនៃម្ហូបរបស់យើង និង ថាមពលផ្លាស់ប្តូរនៃគុណភាពគ្រឿងផ្សំ គឺជាជំនាញរបស់ខ្ញុំ ហើយវាបានធ្វើឱ្យខ្ញុំរីកចម្រើនឥតឈប់ឈរ»។
នៅក្នុងបទពិសោធចម្អិនម្ហូប កំពូលចុងភៅរូបនេះ យកចិត្តទុកដាក់ចម្បងទៅលើសារសំខាន់នៃរឿងរ៉ាវនៅពីក្រោយមុខម្ហូបនីមួយៗ។ លោកប្រកាន់ខ្ជាប់រក្សារូបមន្តប្រពៃណី ខណៈបញ្ចូលនូវតិចនិចថ្មីៗ ដើម្បីបង្កើតនូវការទទួលទានអាហារដែលប្លែក និង មិនអាចបំភ្លេចបាន។ ស្ទាយ៌ចម្អិនរបស់លោក លោកធ្វើឱ្យអ្នកទទួលទានមានអារម្មណ៍ផាសុកភាព ដោយប្រាកដធានាបាននូវរសជាតិគ្រប់ចាន។
ជាចុងភៅកម្ពុជាមួយរូប លោកផ្តោតសំខាន់ប្រើប្រាស់គ្រឿងផ្សំក្នុងស្រុកដូចជា រុក្ខជាតិឱសថបុរាណស្រស់ៗ ម្រេចកំពត ប្រហុក ស្ករត្នោត អំបិល និង អង្ករកម្ពុជា។ លោកក៏សង្កត់ធ្ងន់លើតម្រូវការជួយដល់កសិករក្នុងស្រុក និង អនុវត្តនិរន្តរភាពនៅក្នុងការដំណើរការ និង បណ្តុះបណ្តាលពួកគេផងដែរ។ លោកនិយាយថា៖ «ការគំាទ្រកសិករក្នុងស្រុក គួរតែជាបំណងចុងក្រោយរបស់យើង ប្រសិនបើយើងរក្សាឱ្យកសិកររីករាយ យើងក៏នឹងរីករាយដូចគ្នា»។ ជាការពិត ការធ្វើដូចនេះមិនត្រឹមត្រែពង្រឹងគុណភាពមុខម្ហូបប៉ុណ្ណោះទេ តែថែមទាំងធានាបាននូវអនាគតកាន់តែប្រសើរ សម្រាប់ឧស្សាហកម្មម្ហូបអាហារ និង ភេសជ្ជ រួមទាំងកសិកម្មក្នុងស្រុកផងដែរ។
សម្រាប់អាជីព លោកថាតួនាទីជាចុងភៅគឺបង្កើតពេលវេលាមួយដ៏ស្និទ្ធស្នាល និង អនុស្សាវរីយ៍ពោរពេញដោយក្តីស្រលាញ់តាមរយៈមុខម្ហូបដ៏ឈ្ងុយឆ្ងាញ់។ លោកថា ការរីករាយជាមួយមុខម្ហូបដ៏មានឱជារស អាចមានឥទ្ធិពលចំពោះសុខុមាលភាពផ្លូវចិត្តរបស់យើង ដូច្នេះលោកលើកទឹកចិត្តឱ្យសាកល្បងភោជនីយដ្ឋានថ្មីៗ និង សាកល្បងរសជាតិអាហារឆ្ងាញ់ៗដើម្បីបង្កើនអត្ថន័យជីវិតបន្ថែមទៀត៕
ប្រភព៖ Prestige
