ថ្មីៗកន្លងទៅ លើបណ្ដាញសង្គមហ្វេសប៊ុកមហាជនអ្នកគាំទ្រ ក៏ដូចជាអ្នកស្ថិតក្នុងវិស័យសិល្បៈជាច្រើន បានចែករំលែកបង្ហាញការបារម្ភខ្លាំងដល់តារាកំប្លែងជើងចាស់ល្បីឈ្មោះ នាយ កុយ ក្រោយពីទទួលដំណឹងថាលោកបានធ្លាក់ខ្លួនឈឺសម្រាកព្យាបាលនៅមន្ទីរពេទ្យ។
តាមរយៈការបង្ហោះចែករំលែកពីមហាជន ក៏ដូចជាសិល្បករ-ការិនីពីស្ថានភាពរបស់តារាកំប្លែងរូបនេះ នៅថ្ងៃទី ១០ ខែកុម្ភៈ ឆ្នាំ ២០២៥ កន្លងទៅ បានឱ្យដឹងថាលោកបានធ្វើការវះកាត់ដុំសាច់ដុះក្នុងពោះវៀនធំ នៅមន្ទីរពេទ្យមួយក្នុងប្រទេសថៃ ដោយទទួលបានជោគជ័យ និង បានដឹងខ្លួនពីសន្លប់វិញ គ្រាន់តែកាយសម្បទានៅមិនទាន់រឹងមាំនៅឡើយ។
មកដល់ពេលនេះដែរ តាមរយៈការបង្ហោះលើហ្វេសប៊ុករបស់លោក អ៊ឹម ជីវ៉ា ពីស្ថានភាពជំងឺរបស់ នាយកុយ បានឱ្យដឹងថាពេលនេះលោកបានធូរស្បើយ និង ត្រឡប់មកខ្មែរវិញហើយ ប៉ុន្តែដោយសារតែវះកាត់សាច់កាចក្នុងពោះវៀនធំ លោកត្រូវបន្តទៅព្យាបាលចាក់គីមីនៅថៃវិញទៀតនៅខែក្រោយ។ ជាមួយគ្នានោះ នាយកុយ ក៏បាននិយាយបែបលេងសើចថាក្រោយធូរស្រាលបន្តិចទៀត លោកនឹងអាចចេញបំពេញការងារសិល្បៈវិញបានទៀតផង។
តាមការរៀបរាប់របស់ លោក អ៊ឹម ជីវ៉ា បានឱ្យដឹងថា ៖ «មានអារម្មណ៍ថាអាណិត តារាកំប្លែង លោកគ្រូ កុយ ពេលដឹងថាគាត់មានជំងឺ វះកាត់សាច់កាចពោះវៀនធំ ហើយត្រូវចាក់ថ្នាំគីមីនៅខែក្រោយ។ ស្ថានភាពជំងឺតារាកំប្លែងរូបនេះបានវះកាត់សាច់កាចដំណាក់កាលដំបូងរូចរាល់ហើយ ហើយក៏មានសុខភាពល្អដែរ តែនៅគេងនៅក្រែសិនទម្រាំជាសះស្បើយមុខរបួស ហើយខែក្រោយនិងត្រូវទៅប្រទេសថៃ ឆែកសុខភាពម្តងទៀត និងត្រៀម ចាក់ថ្នាំគីមី។ លោកគ្រូកុយ និយាយលេងសើចថា ខ្ញុំមិនស្លាប់ទេ ពេលឈឺ គឺចង់មានអ្នកផ្តល់កម្លាំងចិត្ត ហើយបងប្អូនអាចកក់រោងបាន ខែក្រោយចេញសម្តែងវិញបានហើយ។ សូមបញ្ជាក់ដែថា តារាកំប្លែងលោកគ្រូកុយ កំពុងកំពុងស្នាក់នៅផ្ទះកូន ក្នុងបុរីរុងរឿង ខណ្ឌជ្រោយចង្វារាជាធានីភ្នំពេញ»៕
