កាលពីថ្ងៃទី ០២ ខែមិថុនា ឆ្នាំ ២០២៥ កន្លងទៅ តារាកំប្លែង នាយពាង បានបង្ហោះសារត្រូវការឈាម ៤ សាក់ ដើម្បីធ្វើការវះកាត់។ កាលនោះដែរ ការប្រកាសខាងលើ នាយពាង ក៏មិនបានបញ្ជាក់ថា អ្នកណាជាអ្នកជំងឺនោះឡើយ។
ដោយឡែក កាលពីថ្ងៃទី ១០ ខែមិថុនា ឆ្នាំ ២០២៥ មហាជនមានការតក់ស្លុតយ៉ាងខ្លាំង ក្រោយទទួលបានដំណឹងរបស់ នាយពាង ដោយស្ថិតនៅក្នុងបន្ទប់សង្គ្រោះបន្ទាន់ បន្ទាប់ពីធ្វើការវះកាត់រួច។ នេះបើតាមការឱ្យដឹងពីប្អូនស្រីបង្កើតរបស់ នាយពាង បានប្រាប់ទៅកាន់ ឌីជេ កណ្តុរ។
ក្នុងនោះដែរ ប្អូនស្រីរបស់ នាយពាង ក៏បានបញ្ជាក់ពីជំងឺរបស់ នាយពាង ដែរថា គឺលោកកើតមហារីកអណ្តាត និង ម្រីងកូនកណ្តុរ ដោយបច្ចុប្បន្នកំពុងសម្រាកនៅមន្ទីរពេទ្យអង្គឌួង។
តាមការជម្រាបពីប្អូនស្រីបង្កើតរបស់ នាយពាង បានឱ្យដឹងថា ពេលនេះក្រុមគ្រួសាររបស់លោកខ្វះខាតថវិកា ដើម្បីព្យាបាលបងប្រុសខ្លាំង ខណៈ នាយពាង ក៏គ្មានការងារធ្វើ រីឯភរិយារបស់ នាយពាង កំពុងមើលថែកូនៗ ៣ នាក់ ដោយកូនពៅទើបតែបាន ៣ ខែ។ ប្អូនស្រី នាយពាង ក៏បានសំណូមពរដល់មហាជន ជាពិសេស ប្រធានសមាគមសិល្បករខ្មែរ គឺលោកជំទាវអ្នកឧកញ៉ា ម៉ៅ ចំណាន ជួយបរិច្ចាគថវិកា ដើម្បីសម្រួលការព្យាបាលដល់លោកផង៕
សូមចុចទីនេះ ដើម្បីទស្សនាវីដេអូទី ១៖
សូមចុចទីនេះ ដើម្បីទស្សនាវីដេអូទី ២៖
