នៅថ្ងៃទី ១១ ខែតុលា ឆ្នាំ ២០២៥ នេះ រដ្ឋមន្ត្រីក្រសួងព័ត៌មាន ឯកឧត្តម នេត ភក្ត្រា បានជូនដំណឹងពីស្ថានភាពវេលាយប់ម៉ោង ១២ រំលងអាធ្រាត្រ ពីភូមិជោគជ័យ និង ព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ឯកឧត្តមបានមានប្រសាសន៍ឱ្យដឹងថា វេលាយប់ម៉ោង ១២ រំលងអាធ្រាត្រ នៅពេលដែលមនុស្សភាគច្រើននៅក្នុងប្រទេសកំពុងសម្រាកលង់លក់ អ្នកភូមិព្រៃចាន់ និង ភូមិជោគជ័យ មិនបានសម្រាកឡើយ ដោយសារតែសំឡេងធុងបាស់ ដែលជនជាតិថៃបានចាក់យ៉ាងទ្រហឹងអឹងកង ជាសំឡេងខ្មោច សំឡេងឆ្កែព្រុស និង ឆ្កែលូ។
ឯកឧត្តមបានបន្តថា នេះជាការបំពុលផ្អែកសំឡេងយ៉ាងធ្ងន់ធ្ងរ ធ្វើឱ្យមនុស្សម្នាមិនអាចសម្រាកបានជាពិសេសក្មេងតូចៗ និង មនុស្សចាស់ជរា និង ប៉ះពាល់ដល់សិទ្ធិដំណេក រំលោភសិទ្ធិមនុស្សយ៉ាងធ្ងន់ធ្ងរ៕
