ប្រភពព័ត៌មានពីរដ្ឋវ៉ាស៊ីនតោន សហរដ្ឋអាមេរិក តារាចម្រៀងប៉ុប Katy Perry និង នារីល្បីៗប្រមាណ ៥ នាក់ទៀត បានធ្វើការហោះហើរទៅទីអវកាសកាលពីថ្ងៃចន្ទ ដោយដំណើរកម្សាន្តមានរយៈពេលត្រឹមតែ ១១ នាទី ជាមួយយានរបស់ក្រុមហ៊ុន Blue Origin។
ចំណោមអ្នកដំណើរនារី ៦ នាក់ ក្នុងនោះមានតារាចម្រៀងប៉ុបដ៏ល្បី Katy Perry, ភរិយាស្ថាបនិកក្រុមហ៊ុន Blue Origin នាង Lauren Sanchez, ពិធីការិនីទូរទស្សន៍ CBS លោកស្រី Gayle King, អតីតអ្នកវិទ្យាសាស្ត្ររ៉ុកកែត NASA នាង Aisha Bowe, អ្នកវិទ្យាសាស្ត្រនាង Amanda Nguyen, និង ផលិតករភាពយន្ត នាង Kerianne Flynn។
ការហោះហើរទៅអវកាសលើកនេះ ក៏ត្រូវបានចាត់ជាផ្នែកមួយក្នុងប្រវត្តិសាស្ត្រ ដែលជាលើកដំបូងបំផុតសម្រាប់អ្នកដំណើរសុទ្ធតែជាមនុស្សស្រី ក្នុងរយៈពេលហោះហើរប្រមាណជាង ៦០ ឆ្នាំមកនេះ។ ក្នុងដំណើរកម្សាន្តតែប៉ុន្មាននាទី យានអវកាសត្រូវហោះចេញពីផែនដីក្នុងចម្ងាយជាង ១០០ គីឡូម៉ែត្រ ដែលអាចឱ្យអ្នកដំណើរអាចទស្សនាទិដ្ឋភាពពីទីលំហយ៉ាងច្បាស់ តាមរយៈបង្អួចកញ្ចក់ថ្លា មើលឃើញភាពអស្ចារ្យនៃផែនដី និង ព្រះចន្ទជាដើម។
ចំពោះការចំណាយលើសំបុត្រជិះយានវិញ ក្រុមហ៊ុនហាក់មិនបង្ហាញផ្លូវការឡើយ។ តែបើតាមគេហទំព័ររបស់ក្រុមហ៊ុន Blue Origin រាល់អ្នកដំណើរដែលចង់ទិញសំបុត្រឡើងទៅអវកាស តម្រូវធ្វើការកក់មុន ១៥ ម៉ឺនដុល្លារ។ ដោយឡែក បើតាមសារព័ត៌មាន The New York Times កាលក្រុមហ៊ុន Blue Origin បើកហោះហើរលើកដំបូងនៅក្នុងឆ្នាំ ២០២១ កៅអីត្រូវបានដាក់ដេញថ្លៃបានរហូតដល់ទៅ ២៨ លានដុល្លារក្នុងមួយកៅអី។
គួរឱ្យដឹងដែរថា ក្រុមហ៊ុន Blue Origin ត្រូវបានបង្កើតឡើងដោយស្ថាបនិក Jeff Bezos ដែលគេស្គាល់ថាជាម្ចាស់ក្រុមហ៊ុន Amazon។ ក្រុមហ៊ុននេះបាននាំអ្នកដំណើរទៅទីអវកាសចាប់តាំងពីឆ្នាំ ២០២១ ដែលមកដល់បច្ចុប្បន្ន បាននាំអ្នកដំណើរទៅកម្សាន្តនៅទីអវកាសប្រមាណ ៥៨ នាក់មកហើយ៕
ប្រភព៖ NDTVWORLD
