នៅវេលាម៉ោង ៧ យប់ ថ្ងៃទី ៩ ខែកុម្ភៈ ឆ្នាំ ២០២៥ កម្លាំងនគរបាលនាយកដ្ឋានប្រឆាំងការជួញដូរមនុស្ស និង ការពារអនីតិជន បានចុះបង្ក្រាបហាងមួយកន្លែងមានស្លាក «ចែមុំបុកល្ហុង» ដែលសង្ស័យមានលួចលាក់បង្កប់សេវាកម្មផ្លូវភេទ ស្ថិតនៅភូមិព្រៃព្រីងខាងជើង ១ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានក្នុងស្រុកមួយឱ្យដឹងថា តាមរយៈអនុប្រធាននាយកដ្ឋានប្រឆាំងការជួញដូរមនុស្ស និង ការពារអានីតិជននលោកឧត្តមសេនីយ៍ទោ តាន់ វណ្ណារ៉ាក់ បានបញ្ជាក់ថា ប្រតិបត្តិការនេះធ្វើឡើងក្រោមការសម្របសម្រួលពីលោក សុខ កែវបណ្ឌិត ព្រះរាជអាជ្ញារងនៃអយ្យការអមសាលាដំបូង រាជធានីភ្នំពេញ ដែលក្នុងនោះបានរកឃើញស្រោមអនាម័យមិនទាន់ប្រើចំនួន ១ និង សៀវភៅ ព្រមទាំងឃាត់ខ្លួនមនុស្សចំនួន ១១ នាក់ ក្នុងមានក្មេងស្រីជាអនីតិជន ៥ នាក់ និង ប្ដីប្រពន្ធម្ចាស់ហាងពីរនាក់។
ក្នុងប្រតិបត្តិការនេះផងដែរ សមត្ថកិច្ចបានឃាត់ខ្លួនម្ចាស់ហាង និង នារីរងគ្រោះចំនួន ៩ នាក់ ដោយបញ្ជូនទៅកាន់នាយកដ្ឋានប្រឆាំងការជួញដូរមនុស្ស និង ការពារអនីតិជនដើម្បីសាកសួរបំភ្លឺ និង ចាត់ការតាមនិតិវិធីបន្ត៕
ប្រភព និង រូបភាព : កម្ពុជាថ្មី
