មហាជនអ្នកគាំទ្រតាមដានវិស័យបវរកញ្ញា និង បុរសឯក សុទ្ធសឹងតែបានស្គាល់ហើយពីលោក ហ៊ាប ស៊ាងហ៊ុយ ដែលជាប្រុសស្អាតដំបូងប្រកួតដណ្ដើមបានជ័យលាភីបុរសឯកក្នុងកម្មវិធី Mister Friendship Cambodia ឆ្នាំ ២០២២។
ម្ចាស់តំណែងបុរសឯក Mister Friendship Cambodia 2022 រូបនេះ ក៏ធ្លាប់បានបំពេញបេសកម្មតំណាងកម្ពុជាចូលរួមប្រកួតលើឆាកអន្តរជាតិកម្មវិធី Mister Friendship International 2022 នៅប្រទេសថៃ ធ្វើបានយ៉ាងល្អទីមោទកភាពសម្រាប់វិស័យបុរសឯកកម្ពុជាផងដែរ។
ក្រោយពីមានឈ្មោះជាបុរសឯក Mister Friendship Cambodia 2022 ប៉ុនា្មនឆ្នាំមកនេះ លោក ហ៊ាប ស៊ាងហ៊ុយ ក៏បានប្រឡូកចូលវិស័យសម្ដែងក្លាយជាតារាប្រុសរូបសង្ហាដ៏មានប្រជាប្រិយភាពមួយរូបដែរ ដោយបានបង្ហាញស្នាដៃសម្ដែងខ្សែភាពយន្តភាគខ្មែរបន្តបន្ទាប់ ទទួលបានការចាប់អារម្មណ៍សរសើរពីទេពកោលស្យរបស់លោកមិនតិចនោះទេ។
ដោយឡែក មកដល់ដើមឆ្នាំ ២០២៥ នេះ អ្វីដែលធ្វើឱ្យមហាជនអ្នកគាំទ្រចាប់អារម្មណ៍ចំពោះប្រុសស្អាតរូបនេះ ទៀត ខណៈបានឃើញលោកបង្ហាញវត្តមានជាថ្មីលើវិស័យបុរសឯកក្នុងនាមជាបេក្ខភាពប្រកួតក្នុងកម្មវិធី Mister Supranational Cambodia 2025 ។ ចំពោះការវិលត្រឡប់ចូលប្រកួតដណ្ដើមជ័យលាភីម្ដងទៀតនេះ លោក ហ៊ាប ស៊ាងហ៊ុយ ក៏កំពុងទទួលបានការគាំទ្រយ៉ាងពេញទំហឹងពីបណ្ដាអ្នកគាំទ្រវិស័យបុរសឯកជាច្រើន ដែលនៅតែជឿជាក់លើសមត្ថភាពរបស់លោក៕
