នៅក្នុងវិស័យហ្វេហ្សិននៅកម្ពុជា លោក មុំ វិទូ គឺជាអ្នកច្នៃម៉ូដដ៏មានប្រជាប្រិយភាពមួយរូប ដែលភាគច្រើនគេស្គាល់ឈ្មោះហៅក្រៅរបស់លោកគឺ San Da។ អ្នកច្នៃម៉ូដវ័យក្មេងរូបនេះ បច្ចុប្បន្នក៏ជាស្ថាបនិកម៉ាកសម្លៀកបំពាក់ SAN-T ដែលកំពុងទទួលបានការពេញនិយមពីអ្នកហ្វេហ្សិននិយម ជាពិសេស តារាសិល្បៈ។
កន្លងមក សម្លៀកបំពាក់ម៉ាក SAN-T ត្រូវបាននិយមស្លៀកពាក់ពីតារាល្បីច្រើនដួងដូចជា៖ តារាចម្រៀង Sophia kao , តារាចម្រៀង Van Norith , តារាសម្តែង និង ចម្រៀង Eung hao David, តារាសម្តែង និង ម៉ូឌែល Neth Raksa, តារាចម្រៀងរ៉េប Emi និង Steezy ជាដើម។
ជំនួបជាមួយ «ប្រជាប្រិយ» លោក San Da ស្ថាបនិក SAN-T បានបង្ហើបអំពីការបង្កើតប្រ៊េននេះផងដែរ។ តួយ៉ាង ម៉ាកសម្លៀកបំពាក់ SAN-T បានបង្កើតឡើងនៅក្នុងឆ្នាំ ២០២០-២០២១ ខណៈពេលដែលលោកបានធ្វើខូឡិកហ្សិនចុងក្រោយ (final Collection) សម្រាប់ការបញ្ចប់ការសិក្សា ហើយក៏បានប្រើឈ្មោះប្រ៊េននេះមកដល់សព្វថ្ងៃ។
សម្លៀកបំពាក់ SAN-T ផ្តោតបែប unisex ឬពាក់បានទាំងបុរស និង នារី។ ស្ថាបនិកបញ្ចេញខូឡិកហ្សិនពីរដងក្នុងមួយឆ្នាំ គឺសម្រាប់រដូវក្តៅ(Summer Collection) និង សម្រាប់រដូវរងាឬរដូវធ្លាក់ខ្យល់(Fall/Winter)។
ចំណែកចក្ខុវិស័យបង្កើតម៉ាកនេះ លោកលើកឡើងថា៖ «ខ្ញុំចង់ឃើញប្រជាជនឬក៏យុវវ័យសម័យថ្មីមានរសជាតិ Lifestyle បែបប្លែកថ្មីមួយផ្សេងទៀត ហើយក៏ចង់ឱ្យវិស័យ fashion style នៅកម្ពុជាដើរទាន់ប្រទេសជឿនលឿននៅលើពិភពលោកផងដែរ»។
លោកបន្ថែមទៀតថា៖ «ខ្ញុំចង់ឱ្យប្រជាជនកម្ពុជាយើង ងាកមកចាប់អាម្មរណ៍ និង គាំទ្រអ្នកច្នៃម៉ូដក្នុងស្រុកយើងឱ្យបានច្រើន ដើម្បីដឹងថាហ្វេហ្សិនប្រទេសយើង ក៏អាចដើរទាន់ប្រទេសគេផងដែរ។»
ពីមួយខូឡិកហ្សិន ទៅមួយខូឡិកហ្សិន ម៉ូដមើលមកហ្វេហ្សិនមិនចាញ់ប្រ៊េនអន្តរជាតិល្បីៗ។ ស្ទីលរបស់ប្រ៊េន SAN-T គឺផ្តោតទៅលើសម្លៀកបំពាក់បែបការិយាល័យ (office wear), ស្ទីលតាមដងវិថី (street wear), ហ្វេហ្សិនលំដាប់ខ្ពស់ (high fashion), ការឌីហ្សាញបែបអេឡេហ្គង់ (elegant design), ស្មាធំ, រាងជាបែប hourglass, long sleeves និង oversized។
ការដកស្រង់ឬ inspiration ភាគច្រើន លោកដកស្រង់ចេញពី office wear និង teenager រួមជាមួយអ្វីគ្រប់យ៉ាងដែលនៅជុំវិញខ្លួន ដើម្បីបំផុសគំនិតធ្វើជា textile ឬ ជា component ដែលគិតថាវាពេញនិយម ឬហៅថា on trend សម្រាប់ឆ្នាំនេះ និង ឆ្នាំក្រោយ។ រីឯការឌីហ្សាញ លោកមានការឌីហ្សាញគោល (base design) ប្រចាំម៉ាកដើម្បីលាយបញ្ចូលគ្នា។
ជាអ្នកបង្កើតម៉ាកឬប្រ៊េនសម្លៀកបំពាក់ក្នុងស្រុក លោក San Da មានទស្សនចំពោះរសនិយមហ្វេហ្សិននៅកម្ពុជាយ៉ាងដូច្នេះថា៖ «ក្នុងនាមខ្ញុំជាស្ថាបនិកម៉ាកសម្លៀកបំពាក់ក្នុងស្រុកម្នាក់ ខ្ញុំមើលឃើញថា រសនិយមប្រជាជនខ្មែរបច្ចុប្បន្ន មានការមិនទាន់បើកចិត្តឱ្យទូលាយជាមួយការឌីហ្សាញបែបប្លែក ឬក៏បែប fashionable នៅឡើយ ជាពិសេសប្រជាជនកម្ពុជាយើង ដែលមានវ័យរាងចំណាស់ ហើយក៏មានវ័យកណ្តាលផងដែរ។
បើសម្រាប់យុវវ័យ ខ្ញុំមើលឃើញថា ភាគច្រើនណាស់ ដែលចូលចិត្តលេងខ្លួនបែប fashion នេះ។ ខ្ញុំចង់ឱ្យពួកគាត់បើកចិត្ត និង ទទួលយកអ្វីដែលថ្មីមួយ រួមទាំងគាំទ្រ ព្រោះវិស័យហ្វេហ្សិន ក៏ជាផ្នែកមួយជួយដល់សង្គម និង ប្រទេសជាតិរីកចម្រើនផងដែរ។»
សម្រាប់ម៉ាក SAN-T លោកតែងរកចំណុចកណ្តាលមួយ ដើម្បីឱ្យការឌីហ្សាញសមស្របទៅនឹងយុវវ័យគ្រប់ស្រទាប់។ ម៉ាកនេះ មិនសង្កត់ទៅលើម៉ូដ ដែលខ្លាំងពេកឬក៏តិចពេកដែរ ពោល គឺជ្រើសរើសឱ្យអតិថិជនគិតថា ពាក់សម្លៀកបំពាក់ប្រ៊េន SAN-T ហើយ គឺមានទំនុកចិត្ត។
គួរឱ្យដឹងដែរថា លោក មុំ វិទូ ឬគេស្គាល់ឈ្មោះហៅក្រៅ San Da បានបញ្ចប់ការសិក្សានៅសាកលវិទ្យាល័យលីមកុកវីង។ សមិទ្ធផលទទួលស្គាល់ពីស្នាដៃរបស់លោករួមមាន៖ ជ័យលាភី Top 5 នៅការប្រកួតកាត់ដេរ ផលិតផលវាយនភណ្ឌ និង សម្លៀកបំពាក់ រដូវកាលទី ១ របស់សហគ្រិនខ្មែរ ,ជាអ្នករៀបចំម៉ូដម្លៀកបំពាក់សម្រាប់ភាពយន្ត stylish movie costumes, រៀបចំម៉ូដសម្រាប់ការដើរបង្ហាញម៉ូដ និង ធ្វើជាអ្នកច្នៃម៉ូដសម្រាប់ការដើរម៉ូដជាច្រើនកម្មវិធី ទាំងឯកជន ទាំងកម្មវិធីក្រសួងទេសចរណ៍ និង ជាអ្នកច្នៃម៉ូដដ៏លេចធ្លោនៅក្រុម La Chhouk Recycled & Creative Fashion ផងដែរ៕
