និយាយដល់ផ្សោតទន្លេមេគង្គ គេតែងភ្នកដល់រមណីយដ្ឋានអន្លង់ផ្សោតកាំពី ជារមណីយដ្ឋានធម្មជាតិ ស្ថិតតាមបណ្តោយដងទន្លេខេត្តក្រចេះ។ ថ្មីៗនេះ រមណីយដ្ឋានបានបន្ថែមសោភ័ណភាពមួយទៀត ដោយទើបដំឡើងរូបថ្មី ជារូបផ្សោតបណ្តើរកូន ធ្វើឡើងពីសំណល់ចាស់ៗ មើលមកស្រស់ស្អាតមួយបែប។
តាមការបង្ហោះរបស់សិល្បករ លោក រៀម មុន្នីស៊ីឡុង រូបផ្សោតបណ្តើរកូន ទើបដំឡើងដល់ទីតាំងម្សិលមិញនេះ ត្រូវបានច្នៃ និង ដំឡើងដោយក្រុមការងាររបស់លោកផ្ទាល់។ វាត្រូវបានធ្វើឡើងពីសំណល់ដបទឹកផ្លាស្ទិក និង សំណាញ់មង ដែលជារបស់ប្រើប្រាស់ បង្កហានិភ័យដល់អាយុជីវិតផ្សោតនាពេលកន្លងមក។
គួរឱ្យដឹងដែរថា លោក រៀម មុន្នីស៊ីឡុង ជាសិល្បករមួយរូប ដែលមានទំនោរកែច្នៃសំណល់ផ្សេងៗមកជាវត្ថុសិល្បៈ។ លោកកែច្នៃរាប់តាំងពីសំណល់ផ្ទះបាយ សំរាម សំរាមសរីរាង្គ និង ផ្លាស្ទិកជាដើម។ តាមរយៈភាពច្នៃប្រឌិតនេះ លោកបានចូលរួមក្នុងព្រឹត្តិការណ៍ជាច្រើនក្នុងស្រុក ហើយក៏ធ្លាប់ទទួលបានវិញ្ញាបនបត្រអំណរគុណពីរដ្ឋមន្ត្រីក្រសួងបរិស្ថានផងដែរ៕
