នៅថ្ងៃទី ៤ ខែកញ្ញា ឆ្នាំ ២០២៥ នេះ នាយកដ្ឋានប្រយុទ្ធនឹងជំងឺឆ្លងរបស់ថៃ បានឱ្យដឹងថា ជំងឺអុតស្វា បានចាប់ផ្តើមឆ្លងជាថ្មី ដោយនៅក្នុងខែសីហា ឆ្នាំ ២០២៥ កន្លងទៅនេះ មានករណីឆ្លងបន្ថែមចំនួន ៥ ករណី។
តាមព័ត៌មានបានឱ្យដឹងថា នៅក្នុងឆ្នាំ ២០២៥ នេះ ករណីឆ្លងជំងឺអុតស្វាមានចំនួន ៦១ ករណី ចាប់ផ្តើមឆ្លងខ្លាំងនៅក្នុងខែឧសភា តែមិនមានករណីស្លាប់ឡើយ។ ចាប់តាំងពីការផ្ទុះឆ្លងលើកដំបូងនាឆ្នាំ ២០២២ កន្លងទៅ ប្រទេសថៃមានករណីឆ្លងជំងឺអុតស្វាយសរុបចំនួន ៩៣៣ ករណី និង មានករណីស្លាប់ចំនួន ១៣ នាក់ទៅហើយ។
យ៉ាងណាមិញ សម្រាប់ការព្យាបាលបើសិនជារោគសញ្ញាស្រាល គឺតម្រូវឱ្យព្យាបាលនៅផ្ទះដោយខ្លួនឯង ឬទៅសម្រាកនៅមន្ទីរពេទ្យក៏បាន តែបើសិនជារោគសញ្ញាធ្ងន់ធ្ងរ ឬមានហានិភ័យខ្ពស់ គឺត្រូវប្រើថ្នាំប្រឆាំងមេរោគ Tecovirimat ហើយត្រូវនៅដាច់ដោយឡែករយៈពេលប្រហែល ២១ ថ្ងៃ៕
ប្រភព៖ Khaosod
