នៅថ្ងៃទី ២៥ ខែសីហា ឆ្នាំ ២០២៥ ចាប់ពីម៉ោង ១៤:២០ នាទី រសៀល កងកម្លាំងយោធារបស់ថៃ បានព្យាយាមរាយបន្លាលួសនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលទល់មុខភូមិសាស្ត្រភូមិ Nong Chan ស្រុក Khok Sung ខេត្តស្រះកែវ ប្រទេសថៃ ប៉ុន្តែក៏ត្រូវបានប្រជាពលរដ្ឋ និង សមត្ថកិច្ច នៅភូមិជោគជ័យ ធ្វើការទប់ស្កាត់យ៉ាងខ្លាំង ទើបកងកម្លាំងរបស់ថៃយកបន្លាលួសនោះត្រឡប់ទៅវិញ។
តាមរយៈការរាយបន្លាលួសនៅភូមិជោគជ័យនេះដែរ គេសង្កេតឃើញមានកម្លាំងប្រជាពលរដ្ឋតតាំងសំឡេងយ៉ាងស្វាហាប់ ប្រឆាំងការឈ្លានពានវាទទីរបស់ភាគីថៃ ដែលក្នុងនោះមានទាំង ស្ត្រីដែលមានកូនតូច ដៃម្ខាងបីកូន ដៃម្ខាងទៀតកាន់ដំបងទាញបន្លាលួស ព្រមទាំងមានយុវតីខ្មែរ លោកគ្រូអ្នកគ្រូ និង កម្លាំងប្រជាពលរដ្ឋដែលជាម្ចាស់ស្រុកផ្ទាល់ជាច្រើន។
យ៉ាងណាមិញ ទាក់ទិនទៅនឹងករណីថ្ងៃទី ២៥ ខែសីហា នេះ ក្រសួងការពារជាតិ បានឱ្យដឹងថា កម្ពុជាស្នើឱ្យភាគីថៃគោរពឱ្យបានពេញលេញ និង ខ្ជាប់ខ្ជួននូវបទឈប់បាញ់ និង ជាពិសេសស្មារតីនៃកិច្ចព្រមព្រៀង នៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) រវាងយោធភូមិភាគទី ៥ របស់កម្ពុជា និង កងទ័ពភូមិភាគទី ១ របស់ថៃ ដែលបានប្រព្រឹត្តឡើងកាលពីថ្ងៃទី ២២ ខែសីហា ឆ្នាំ ២០២៥ កន្លងទៅថ្មីៗនេះ ពាក់ព័ន្ធនឹងការមិនពង្រីកភូមិសាស្ត្រ នៃជម្លោះ និង ជៀសវាងទង្វើដែលនាំទៅដល់ការកើនឡើងនៃភាពតានតឹង។ កម្ពុជាបញ្ជាក់ថា រាល់ទំនាស់ពាក់ព័ន្ធនឹងបញ្ហាព្រំដែនត្រូវយកទៅដោះស្រាយដោយគណៈកម្មាធិការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ ស្របតាមស្មារតីនៃអនុស្សរណៈនៃការយោគយល់ឆ្នាំ ២០០០ (MOU 2000)៕
