ថ្មីៗនេះ មានការផ្ទុះចចាមអារ៉ាមសង្ស័យយ៉ាងខ្លាំងទៅលើតារាស្រី Due Arisara ដែលទាក់ទងនឹងករណីឆបោកគ្រឿងអលង្ការពីស្រ្តីហាយសូរម្នាក់ ដែលមានតម្លៃសរុបជិត ២ លានដុល្លារ។
ស្រ្តីហាយសូរខាងលើនេះមានឈ្មោះថា Madame Meni បានទម្លាយឱ្យដឹងថាមានមិត្តម្នាក់ ដែលជាតារាល្បីបានខ្ចីខ្សែកពេជ្រ នាឡិកា កាបូប ដែលសុទ្ធតែជារបស់ប្រ៊េនមានតម្លៃ ៦២ លានបាត ដែលស្មើប្រមាណជិត ២ លានដុល្លារអាមេរិកពីនាងទៅ។ ក្នុងនោះ កំណត់ត្រឹម ១៥ ថ្ងៃ ឱ្យយករបស់មកប្រគល់មកឱ្យវិញ ប៉ុន្តែមកទល់ពេលនេះ មិត្តដែលជាតារានោះមិនទាន់ប្រគល់មកឱ្យវិញនៅឡើយទេ ហើយមានអ្នកបង្ហើបឱ្យដឹងថា នាងបានយកទៅលក់អស់ហើយ។ ស្រ្តីហាយសូរក៏បានដាក់ពាក្យបណ្តឹងរួចរាល់ និង រង់ចាំមិត្តរូបនោះចូលខ្លួនមកដោះស្រាយផងដែរ។
យ៉ាងណាមិញ ករណីនេះបានធ្វើឱ្យមហាជនចាប់អារម្មណ៍យ៉ាងខ្លាំង ហើយក្នុងនោះក៏មានការសង្ស័យទៅលើតារាស្រី Due Arisara។ លោក Num Kanchai ដែលជាពិធីករល្បី បានទម្លាយឱ្យដឹងថា តារាដែលជាអ្នកខ្ចីនោះ គឺពិតជា Due Arisara ពិតមែន ហើយលោកនៅតែរង់ចាំឱ្យនាងចេញមកបកស្រាយ។ ដោយឡែក មកទល់ពេលនេះ តារាស្រី Due Arisara នៅមិនទាន់បានចេញមុខមកបកស្រាយពីរឿងនេះនៅឡើយទេ៕
ប្រភព៖ Kapook
