ផ្លូវចិត្តពិតជាសំខាន់ កាលណាផ្លូវចិត្តមិនល្អប្រសើរ ពិភពលោកនេះហាក់តូចចង្អៀត ឯសុខភាពរាងកាយក៏ប៉ះពាល់ធ្ងន់ធ្ងរ។ ថ្មីៗនេះ មានការពេញនិយមថ្មីទៀតសម្រាប់ការរំដោះផ្លូវចិត្ត ដោយគ្រាន់តែចូលទៅក្នុងទីតាំងមួយហៅថា Rage Room យើងអាចបញ្ចេញកំហឹង តាមរយៈសកម្មភាពវាយកម្ទេច បំបែក និង បំផ្លាញវត្ថុផ្សេងៗ ដោយមិនមានផលវិបាកអ្វីឡើយ។ កាលណាបានបញ្ចេញកំហឹង នោះទុក្ខសោក ស្ត្រេស និង ភាពតប់ប្រមល់ទាំងឡាយ នឹងរសាយមួយគ្រា។
អាចថាថ្មីសម្រាប់យើង តែមានយូរគួរសមដែរនៅឯបរទេស។ Rage Room អាចហៅម្យ៉ាងទៀតថា បន្ទប់កម្ទេច (smash room) ឬ បន្ទប់កំហឹង (anger room) ធ្វើឡើងសម្រាប់ការបំផ្លាញ វាជាកន្លែងដែលមនុស្សអាចរំដោះកំហឹង និង ស្ត្រេស នៅកន្លែងមួយដែលគ្រប់គ្រងត្រឹមត្រូវ។ បន្ទប់នេះត្រូវបានគេដាក់ទៅដោយរបស់ដែលអាចបំផ្លាញបាន ដូចជា ដបកែវ គ្រឿងអេឡិចត្រូនិច និង សង្ហារិមជាដើម។ អ្នកចូលទៅក្នុងបន្ទប់ ត្រូវបានផ្តល់ឱ្យនូវឧបករណ៍សម្រាប់កម្ទេចរាប់តាំងពីដំបង រហូតដល់ញញួរធំៗ។ ក្រោយពេលប្រើកំហឹងវាយរបស់អស់ទាំងនោះ វានឹងធ្វើឱ្យអារម្មណ៍ធូរស្រាលឡើង។
អ្នកចូលទៅក្នុងបន្ទប់អាចជ្រើសរើសអ្វីដែលពួកគេចង់វាយបំបែក ចាក់តន្ត្រីដែលចង់ឮ និង រយៈពេលនៃការចូលរបស់ពួកគេ។ សុវត្ថិភាពគឺជាផ្នែកមួយដ៏សំខាន់សម្រាប់បន្ទប់ Rage Room តួយ៉ាង អ្នកចូលក្នុងបន្ទប់ត្រូវពាក់ការពារដូចជា ស្រោមដៃ មួយការពារសុវត្ថិភាព ស្បែកជើងកវែង និង អាវក្រៅការពារជាដើម។ និយាយរួម បន្ទប់នេះត្រូវប្រាកដថា អ្នកចូលលេងគឺមានសុវត្ថិភាពបំផុត។
ការចូលបន្ទប់ Rage Room មិនគ្រាន់តែជាកន្លែងបញ្ចេញកំហឹងនោះទេ តែវាក៏ជាកន្លែងឱ្យចេះគ្រប់គ្រងកំហឹងផងដែរ។
និយាយពីដើមកំណើតបន្ទប់ Rage Room បើតាមគេហទំព័រ The Mad house វាមានប្រភពនៅប្រទេសជប៉ុនក្នុងឆ្នាំ ២០០០។ គេបង្កើតវាឡើងសម្រាប់ការឆ្លើយតបទៅនឹងបរិយាកាសការងារដែលមានភាពតានតឹងខ្ពស់។ គំនិតនេះវាបានរីកសាយភាយទៅកាន់ប្រទេសជាច្រើនទៀតជុំវិញពិភពលោក ជាពិសេសនៅទីក្រុង រាប់ទាំងទីក្រុង ឡុងដ៍ នៅអង់គ្លេស និង ទីក្រុង Los Angeles សហរដ្ឋអាមេរិកក៏ពេញនិយមផងដែរ។
ប៉ុន្មានឆ្នាំក្រោយនេះ Rage Room បានលូតលាស់យ៉ាងរហ័ស ដោយសារវាបញ្ជ្រាបការយល់ដឹងបានមួយផ្នែកអំពីសុខភាពផ្លូវចិត្ត និង តម្រូវការសម្រាប់រំដោះស្ត្រេស។ ហើយថ្មីៗនេះ វាក៏បានមកដល់កម្ពុជា ដោយឃើញមានកន្លែងមួយបើកនៅទីក្រុងភ្នំពេញឈ្មោះថា escapezonekh។ កន្លែងនេះបើកចម្រុះ មានជាបន្ទប់ខារ៉ាអូខេ បន្ទប់ទស្សនាភាពយន្ត បន្ទប់សិល្បៈ និង បន្ទប់ Rage Room ដែលអាចទៅកម្សាន្ត និង បន្ធូរអារម្មណ៍។
បើតាមការឆ្លើយឆ្លង Comment នៅក្នុង TikTok ការចូលបញ្ចេញកំហឹងក្នុងបន្ទប់ Rage Room ម្តង ម្នាក់តម្លៃ ១៥ ដុល្លារ រីឯពីរនាក់តម្លៃ ២៥ ដុល្លារ។ ចុះសម្រាប់ប្រិយមិត្តវិញយល់យ៉ាងណាដែរ?៕
