រយៈពេលជិត ១ ខែហើយ ដែលតារាចម្រៀងស្រី រ៉ាប៊ី និង លោក Nick Taylor បានក្លាយជាស្វាមីភរិយាស្របតាមប្រពៃណី ដោយអ្នកទាំងពីរ បានរៀបចំកម្មវិធីអាពាហ៍ពិពាហ៍យ៉ាងធំអធិកអធមកាលពីថ្ងៃទី ៩ ខែឧសភា ឆ្នាំ ២០២៥ កន្លងទៅ។
ក្រោយពីរៀបការរួច រ៉ាប៊ី និង Nick Taylor បានចាប់ដៃគ្នាសាងគ្រួសារយ៉ាងមានក្ដីសុខក្រោមឈ្មោះជាប្ដីប្រពន្ធដ៏ផ្អែមល្ហែម ស្ដែងឱ្យមហាជនបានឃើញ និង លួចច្រណែន គ្រាន់តែអ្នកទាំងពីរពុំទាន់មានពេលវេលាសម្រាប់ដើរកម្សាន្តសាងភាពផ្អែមល្ហែម ឬទៅក្រេបទឹកឃ្មុំនៅឡើយ ដោយពួកគេសុទ្ធតែមមាញឹកខ្លាំងនឹងការងាររៀងៗខ្លួន។
ដោយឡែក ពេលនេះដែរ ប្ដីប្រពន្ធថ្មីថ្មោងមួយគូនេះ ក៏កំពុងធ្វើឱ្យមហាជនចាប់អារម្មណ៍ និង រំភើបជំនួស ខណៈឃើញ រ៉ាប៊ី បានបង្ហោះសកម្មភាពធ្វើដំណើរកម្សាន្តទៅក្រេបទឹកឃ្មុំជាមួយស្វាមីបណ្ដូលចិត្តយ៉ាងផ្អែមល្ហែម នៅលើកោះដ៏ល្បីនៅប៉ែកអាស៊ីខាងត្បូង គឺកោះម៉ាល់ឌីវ ជាមួយការបង្ហាញរូបភាពជាគូស្អាតៗបែបអភិជនបង្ហោះនៅលើហ្វេសប៊ុក៕
