ថ្មីៗនេះ មហាជននៅក្នុងបណ្តាញសង្គម ដ៏ដូចជាសារព័ត៌មានរបស់ជប៉ុន បានមានប្រតិកម្មយ៉ាងខ្លាំងទៅលើអាកប្បកិរិយាដ៏គ្មានសីលធម៌របស់ Influencer ដ៏ល្បីជនជាតិថៃម្នាក់ ដែលបានដោះអាវឡើងរាំនៅលើឡានដូចជាមនុស្សបែកថ្នាំ នៅមុខភ្នំ Fuji ដែលជាកន្លែងទេសចរណ៍ដ៏ល្បី។
តាមព័ត៌មានបានឱ្យដឹងថា Jack Papho ដែលជា Influencer របស់ថៃ បានទៅលេងប្រទេសជប៉ុនជាមួយនឹងគ្រួសារ ហើយក៏ឆ្លៀតធ្វើ Content ដោយបានដោះអាវឡើងរាំលើឡានដែលខ្លួនបានជួលធ្វើដំណើរ ដែលកំពុងតែចតនៅនឹងមុខផ្សារទំនើប Lawson ជាកន្លែងទេសចរណ៍សំខាន់ស្ថិតនៅនឹងមុខភ្នំ Fuji តែម្តង។ Jack Papho ក៏បានយកវីដេអូនេះមកផុសនៅក្នុងបណ្តាញសង្គមរបស់ខ្លួន ដែលធ្វើឱ្យប្រជាជនថៃជាច្រើននាំគ្នាចូលខមិនដោយការមិនពេញចិត្ត តែ Jack Papho ក៏នៅតែមិនព្រមលុបចេញ ព្រមទាំងនិយាយឌឺដងទៅវិញថែមទៀតផង។
មិនយូរប៉ុន្មានវីដេអូនេះក៏បានចែកចាយពេញបណ្តាញសង្គមរបស់ជប៉ុន ហើយក៏ធ្លាយដល់សារព័ត៌មានយកទៅចុះផ្សាយថា Influencer ជនជាតិថៃម្នាក់ បានបង្កភាពវឹកវរនៅក្នុងប្រទេសជប៉ុន ដោយរាំនៅលើដំបូលរថយន្ត នៅ Lawson ពីមុខភ្នំ Fuji វាជារឿងអាម៉ាស់មួយសម្រាប់ប្រទេសថៃ។ ក្នុងនោះដែរ មហាជននៅតាមបណ្តាញសង្គមរបស់ជប៉ុន ក៏បានចូលទៅរិះគន់បន្ថែមទៀត រហូតដល់ចុងក្រោយ Jack Papho ដាច់ចិត្តលុបវីដេអូរបស់ខ្លួនចេញ៕
ប្រភព៖ Matichon
