មហាជនបានទស្សនាវីដេអូរបស់អតីតតារាភាពយន្ត សុខ ស្រីមុំ ដែលបានប្រើពាក្យធ្ងន់ៗប្រមាថដល់អង្គព្រះមហាក្សត្រខ្មែរ និង សម្ដេចព្រះមហាក្សត្រីយានី ជាទីសក្ការៈដ៏ខ្ពង់ខ្ពស់នៃប្រជានុរាស្ត្រខ្មែរ ត្រូវបានចែករំលែកជាបន្តបន្ទាប់ បើទោះជាវីដេអូដើម ត្រូវបានលុបចោលទៅហើយក្តីកាលពីថ្ងៃទី ២៥ ខែសីហា ឆ្នាំ ២០២៥ កន្លងទៅ ក្រោយពីផុសបានប៉ុន្មានម៉ោង។
ក្នុងពាក្យសម្តីទាំងអស់នោះ បានធ្វើឱ្យប្រជានុរាស្ត្រខ្មែរមិនអាចទទួលយកបាន ដោយមានអ្នកចូលបញ្ចេញមតិប្រតិកម្មជាបន្តបន្ទាប់ និង បានលើកឡើងថា អ្នកនាង សុខ ស្រីមុំ ទៅក្រៅប្រទេសយូរភ្លេចកំណើត និង ខ្លះទៀតលើកឡើងថា តារាភាពយន្តរូបនេះមិនបានដឹងព័ត៌មានក្នុងស្រុកអីបន្តិចសោះឡើយ ទើបថ្លើមធំហ៊ានប្រមាថដល់អង្គព្រះមហាក្សត្រ និង សម្ដេចហ្លួងម៉ែ។
យ៉ាងណាមិញ ក្រោយរងព្យុះប្រតិកម្មពីសំណាក់ ប្រជាជនខ្មែរហើយនោះ នៅថ្ងៃទី ២៦ ខែសីហា ឆ្នាំ ២០២៥ អ្នកស្រី សុខ ស្រីមុំ បានចេញវីដេអូសុំទោសប្រជាជនកម្ពុជា និងក្រាបបង្គំសុំប្រទានទោសពី ព្រះមហាក្សត្រ និង ហ្លួងម៉ែ ដោយ អ្នកនាងបញ្ជាក់ថា មូលហេតុមកពីមានគេផ្ញើព័ត៌មានក្លែងក្លាយឱ្យ ទើបធ្វើឱ្យអ្នកនាងមានអារម្មណ៍ខឹង ចេញវីដេអូបែបនេះ។
អតីតតារាភាពយន្តរូបនេះ បានឱ្យដឹងថា មានគេផ្ញើព័ត៌មានក្លែងក្លាយឱ្យអ្នកនាង ថាក្មេងៗអត់អាហារ អត់ទឹក ធ្វើឱ្យអ្នកនាងទប់ចិត្តមិនបាន ក៏ខឹង និង បានប្រើពាក្យសម្តីមិនព្រហើនមិនសមរម្យទៅលើអង្គព្រះមហាក្សត្រ និង ហ្លួងម៉ែ ដូច្នេះអ្នកនាងចេញមកក្រាបបង្គំសុំប្រទានទោស លុបលាងកំហុស សូមព្រះមហាក្សត្រ និង ហ្លួងម៉ែ លើកលែងទោសកំហុសឱ្យអ្នកនាងផង៕
សូមចុចទីនេះ ដើម្បីទស្សនាវីដេអូ៖
