ខំត្រដាបត្រដួសរកលុយព្យាបាលប្តី ៥ ឆ្នាំ ពេលនេះប្រពន្ធ Winai ត្រូវបាត់បង់ប្តី ក្លាយជាស្ត្រីមេម៉ាយចិញ្ចឹមកូន ៣ នាក់តែម្នាក់ឯង
នៅថ្ងៃទី ២១ ខែមីនា ឆ្នាំ ២០២៤ នេះ លោក Winai kraibutr ដែលជាតារាសម្តែងជើងចាស់របស់ថៃ ត្រូវបានគេស្គាល់ថាតួប្តីនៅក្នុងរឿង «នាងណាត» កាលពីជាង ២០ ឆ្នាំមុន បានលាចាកលោកទៅហើយ ក្រោយពីតស៊ូជាមួយនឹងជំងឺពងបែកយ៉ាងវេទនាមកជាច្រើនឆ្នាំ។
ក្នុងនោះ ភរិយារបស់លោកបានឱ្យដឹងថា ស្វាមីរបស់ខ្លួនបានបាត់បង់ជីវិតនាម៉ោងប្រមាណ ១១ និង ៤៩ នាទីយប់ កាលពីថ្ងៃទី ២០ ខែមីនា ឆ្នាំ ២០២៤ កន្លងទៅនេះ ដោយសារតែការឆ្លងមេរោគក្នុងឈាមយ៉ាងធ្ងន់ធ្ងរ ធ្វើឱ្យបេះដូងឈប់ដើរ។
យ៉ាងណាមិញ ក្រៅពីមានការសោកស្តាយទៅលើការបាត់បង់លោក Winai ហើយ មហាជនជាច្រើនក៏មានការអាណិតទៅអាសូរជាខ្លាំងទៅលើភរិយារបស់លោកផងដែរ ព្រោះតាំងពីស្វាមីធ្លាក់ខ្លួនឈឺជាង ៥ ឆ្នាំមក នាងមិនដែលទៅណាចោលលោកមួយជំហាននោះទេ។
នាងជាស្រ្តីដែលតស៊ូបំផុត ស៊ូរកលុយព្យាបាលប្តី និង មើលថែជូតខ្ទុះជូតឈាម ព្យាយាមស្វះស្វែងរកគ្រប់វិធីគ្រប់យ៉ាងដើម្បីតែប្តីបានធូរស្បើយ ដោយនាងមិនដែលបង្ហាញភាពអត់នឿយរអ៊ូរទាំនោះទេ។ ជាអកុសល បើទោះជានាងខំអស់ពីសមត្ថភាពយ៉ាងក៏ដោយ ចុងក្រោយនាងនៅតែត្រូវក្លាយជាស្រ្តីមេម៉ាយទទួលបន្ទុកកូនប្រុសស្រី ៣ នាក់តែម្នាក់ឯងទៀត។ ជាមួយគ្នានេះ មហាជនជាច្រើនក៏បានផ្តល់ជាពាក្យពេជន៍លើកទឹកចិត្តផងដែរ ដើម្បីឱ្យកម្លាំងចិត្តនាងក្នុងការចិញ្ចឹមបីបាច់កូនៗតទៅទៀត៕