និយាយពីភាពយន្តបុរាណខ្មែរបែបព្រឺព្រួច ភ័យរន្ធត់រឿង «ខ្មោចដើមចេកជ្វា» មហាជនអ្នកគាំទ្រដែលធ្លាប់ទស្សនាបានជ្រាបហើយថាភាពយន្តបុរាណមួយនេះ ផ្ទុះល្បីល្បាញខ្លាំងតាំងពីអំឡុង ២០០៥ មក។
យ៉ាងណាមិញ ក្រោយពីភាពយន្តល្បីល្បាញរំលងជាង ២០ មកដល់ថ្មីៗកន្លងទៅ ក៏បានឃើញផលិតករភាពយន្តខ្មែរ ក្នុងផលិតកម្ម Tiny Film Production បានប្រកាសត្រៀមផលិតនូវខ្សែភាពយន្តខ្មែរ «ខ្មោចដើមចេកជ្វា» ឡើងវិញ ទៅជាភាពយន្តខ្នាតធំដ៏ព្រឺព្រួចចាក់បញ្ចាំងក្នុងរោងភាពយន្តនៅឆ្នាំ ២០២៥ ម្ដង។
ក្នុងនោះ ផលិតកម្ម Tiny Film Production ក៏បានឱ្យដឹងថាគម្រោងនៃការផលិតភាពយន្តដ៏ល្បីនេះឡើងវិញ នឹងមានការចូលរួមសហការផលិតដោយផលិតករ និង អ្នកដឹកនាំជើងចាស់កាលពីឆ្នាំ ២០០៥ នោះ គឺលោក ហេង តុលា ផងដែរ។ ការបង្ហោះរបស់ Tiny Film Production បានរៀបរាប់ថា ៖ «“ឱអ្នកប្រុសរូបស្អាត ចូលពួននៅគុម្ពម៉ាតស្ងួនរកមិនឃើញ” ខ្សែភាពយន្តខ្មែរល្បីរន្ទឺកាលពី ២០ ឆ្នាំមុន បានត្រឡប់មកវិញដោយមានការសហការផលិតជាមួយនឹងផលិតករ និង អ្នកដឹកនាំជើងចាស់កាលពីឆ្នាំ ២០០៥ គឺលោក ហេងតុលា នឹងផ្តល់ជូនជាថ្មីនូវភាពរន្ធត់ព្រឺរោមហើបខ្លួនពីកៅអីជាមួយសាច់រឿងចាស់បូកបច្ចេកទេសថ្មី មកដល់រោងភាពយន្តឆ្នាំ 2025 កុំភ្លេចរង់ចាំទស្សនាទាំងអស់គ្នា #tinyfilmproduction #ខ្មោចដើមចេកជ្វា2025»។
បន្ទាប់ពីផលិតកម្ម Tiny Film Production ចេញបង្ហោះសារ និង Poster នៃការផលិតភាពយន្ត «ខ្មោចដើមចេកជ្វា» ២០២៥ នេះភ្លាម មហាជនអ្នកគាំទ្រវិស័យភាពយន្តខ្នាតធំ បានផ្ទុះចាប់អារម្មណ៍ចែករំលែក និង បង្ហាញចិត្តរងចាំទស្សនាស្នាដៃថ្មីនៃការផលិតសាច់រឿងដ៏ព្រឺព្រួចនេះឡើងវិញ។
លើសពីនេះ ផលិតកម្មក៏បានបង្ហោះបង្ហើបទាក់ទងនឹងការត្រៀមថតសាច់រឿង «ខ្មោចដើមចេកជ្វា» ២០២៥ នេះជាបន្តបន្ទាប់ ដោយបានជ្រើសរើសតួអង្គសម្ដែងរួចរាល់ហើយ រីឯទីតាំង និង ប្លង់ផ្សេងៗក៏កំពុងស្វែងរកត្រៀមដំណើរការថតឆាប់ផងដែរ។ ជាក់ស្ដែង ថ្មីៗនេះ ក៏បានឃើញខាងផលិតកម្ម Tiny Film Production បានបង្ហោះរូបភាពផ្ទះបុរាណមួយដូចទៅនឹងផ្ទះបុរាណចាស់ថតរឿងនេះកាលពីជំនាន់ឆ្នាំ ២០០៥ ដោយអាចនឹងជាទីតាំងដែលផលិតកម្មជ្រើសរើសត្រៀមថតឡើងវិញក្នុងឆ្នាំ ២០២៥ នេះផងដែរ៕
