ពិតណាស់ ជុំវិញរឿងរ៉ាវដ៏ក្ដៅគគុកដែលមហាជនអ្នកគាំទ្របានផ្ទុះការចែករំលែកវែកញែក និង ប្រតិកម្មខ្លាំងលើពិធីករកីឡាឈ្មោះ Mc Vutha ក្រោយពីឃើញវីដេអូមួយលោកបាននិយាយប្រើពាក្យសម្ដីមិនសូវសមរម្យបែបបញ្ឆិតបញ្ឆៀងលេបខាយលើរូបរាងកាយរបស់នារី Model ក្នុងកម្មវិធីកីឡាមួយ ដែលមហាជនចាត់ទុកជាពាក្យសម្ដីបំពានមើលងាយដល់ស្រ្តីខ្មែរ។
ស្របពេលមហាជនអ្នកគាំទ្រ ក៏ដូចជាអ្នកក្នុងចង្កោមសិល្បៈជាច្រើនបានផ្ទុះរិះគន់មិនពេញចិត្តខ្លាំងលើពាក្យសម្ដីរបស់ពិធីកររូបនេះ ក្រឡេកទៅមើលហ្វេសប៊ុករបស់ MC Vutha ក៏បានឃើញលោកចេញវីដេអូមួយដោយនិយាយសុំទោសទៅកាន់នារី Model ជុំវិញរឿងយកវីដេអូនេះបង្ហោះលើហ្វេសប៊ុក ដែលធ្វើឱ្យប៉ះពាល់ដល់កិត្តិយស និង សេចក្ដីថ្លៃថ្នូររបស់នាង។
ចំពោះវីដេអូសុំទោសនេះដែរ ត្រូវបានមហាជនលើបណ្ដាញសង្គមចែករំលែក និង វែកញែកជាថ្មី ដោយក្នុងនោះមតិភាគច្រើនរបស់មហាជនគឺមិនសូវពេញចិត្តចំពោះការសុំទោសរបស់លោកឡើយ ដោយគិតថាលោកពុំទាន់បានទទួលកំហុសនូវពាក្យសម្ដីដែលលោកបាននិយាយទៅកាន់នារីម៉ូឌែលរូបនោះនៅឡើយ គ្រាន់តែសុំទោសត្រឹមតែការកាត់តវីដេអូបង្ហោះដោយមិនមានការអនុញ្ញាតប៉ុណ្ណោះ។
សារនោះ នារី Model រស្មី បានបង្ហោះរៀបរាប់ថា ៖ «នាងខ្ញុំ មុនីរស្មី ដែលជា ម៉ូដែលនៅក្នុងវីដេអូដែលពុកម៉ែបងប្អូនបានឃើញ។ នាងខ្ញុំមកទីនេះ ដើម្បីអរគុណ ពុកម៉ែ បងប្អូន មិត្តរួមការងារ មហាជនទាំងអស់ដែលបានបញ្ចេញមតិ និង បង្ហាញនូវក្តីស្រឡាញ់មកចំពោះនាងខ្ញុំ។ ក្តីស្រឡាញ់រាប់អាន ការផ្ញើសារលើកទឹកចិត្តរបស់បងប្អូន បានជួយសម្រាលការខូចចិត្ត និង សេចក្តីខ្មាសអៀនរបស់ខ្ញុំច្រើន នាងខ្ញុំពិតជាអរគុណនូវទឹកចិត្តដែលមិនអាចកាត់ថ្លៃបាន។ ការនិយាយបៀតបៀនជាសាធារណៈ និង ការសុំទោសតាមវីដេអូមករូបនាងខ្ញុំដែលមាននូវអត្ថន័យ ទទួលកំហុសរបស់ពិធីករដែលខ្ញុំមិនសូវស្គាល់ដែរនោះ នៅមានលក្ខណៈមិនពេញលេញនៅចំណុចខ្លះ។
– មិនសំពះសុំទោស ឥរិយាបថមិនចេញពីចិត្ត (អាចប្រហែលគាត់គិតថា ខ្ញុំដូចជាឈ្មោះ រស្មី ហ្នឹង មានអាយុ តិចជាង) តែកន្លែងគាត់គួរច្បាស់ជាងនេះ គឺ ខ្ញុំ និង គាត់ ខ្មែរដូចគ្នា ហើយគាត់បាននិយាយបៀតបៀនខ្ញុំជាស្រី។
– ខ្លឹមសារនៅក្នុងវីដេអូ គឺ ខុសពី admin ដែលផុស ច្រើនជាងការនិយាយបៀតបៀន មានន័យថាគាត់ នៅចាត់ទុកថា វាគឺជាការនិយាយលេងសើចដដែល។
– មិនបានបញ្ជាក់ថា ឈប់ពោលពាក្យបៀតបៀនមនុស្សស្រី ស្ត្រី និង ក្មេងស្រី។
– មិនបញ្ជាក់ថា ខ្លួនមិនត្រូវនិយាយបៀតបៀនចំពោះបុគ្គលណាក៏ដោយ (មិនមែនត្រឹមខ្ញុំមនុស្សគាត់មិនស្គាល់ទេ គឺ ក្មេងចាស់ប្រុសស្រី ភេទណាក៏ដោយ សុទ្ធតែមិនត្រូវ មិនសក្ត័សមឱ្យមានការបៀតបៀន តាមគ្រប់រូបភាព)។
នៅមានចំនុចផ្សេងទៀត តែមិនដឹងនិយាយពីណាទៅណាឱ្យសម ព្រោះមិនចង់រឮកនូវពាក្យដែលនាងខ្ញុំទទួលបានពីគាត់ និង មជ្ឈដ្ឋានរបស់គាត់ឡើងវិញ។ នាងខ្ញុំបានតាំងចិត្តមកសរសេរនៅទៅនេះដំបូង និង តែម្តងគត់ សម្រាប់រឿងរ៉ាវដែលបានកើតឡើងនេះ ព្រោះមិនចង់និយាយច្រើន គិតច្រើន តែក៏មានចិត្តមួយទៀតថា ខ្ញុំក៏មិនត្រូវអនុញ្ញាតឱ្យសកម្មភាពបែបនេះកើតឡើងទៀតចំពោះនាងខ្ញុំ ឬបុគ្គលណាម្នាក់បន្តទៀតឡើយ។ តើនាងខ្ញុំគួរធ្វើបែបណា? តើវីដេអូសុំទោសរបស់គាត់មួយនោះ គ្រប់គ្រាន់ឱ្យនាងខ្ញុំលើកលែងឱ្យគាត់ទេ? តើស្ត្រី និង ក្មេងស្រីដែលជួបបញ្ហា ដូចឬស្រដៀងនឹងនាងខ្ញុំ គួរធ្វើបែបណា រកអ្នកណា ដែលអាចជួយគាំទ្រ និង ដោះស្រាយឱ្យនាពេលដែលអាចកើតឡើងលើកក្រោយទៀត? តើអ្នកដែលមានម្តាយ ប្រពន្ធ បងប្អូនស្រី មិត្តស្រី ក៏នៅតែអាចមិនយល់ពីការផ្តល់តម្លៃស្ត្រីមែនទេ? តើសក្តិសមទេដែលមនុស្សស្រី ត្រូវបានកំណត់ដោយទស្សនៈផ្សេងៗ ថាខ្សោយ ឬថាជាទេសភាពសម្រាប់ទស្សនា ដូចដែលពាក្យពិធីករថា បានឃើញហើយ (ក្តក់មាត់) មនុស្សប្រុសយើងអាយុវែងនោះ? មតិយោបល់ និង ដំបូន្មានរបស់បងប្អូន ពិតជាមានន័យណាស់សម្រាប់នាងខ្ញុំ ជាពិសេស ស្ត្រី និង ក្មេងស្រីគ្រប់រូប»៕
