ការរបូតតំណែង Top និង មកុដកម្មវិធី Miss Supranational Cambodia 2025 របស់ អេនណា រ៉ូស កំពុងក្លាយជាប្រធានបទដ៏ក្ដៅគគុកមួយ ធ្វើឱ្យមហាជនអ្នកលេងបណ្ដាញសង្គមមានការចាប់អារម្មណ៍មិនតិចនោះទេ ព្រោះគ្រាន់តែចុះពីឆាកប្រកួតភ្លាម រ៉ូស បានបង្ហោះសារបន្តបន្ទាប់ បង្ហាញយ៉ាងច្បាស់ថានាងមិនពេញចិត្តចំពោះលទ្ធផលនេះទាល់តែសោះ។
អំឡុងពេលប្រកួត រហូតដល់វគ្គប្រកួតផ្ដាច់ព្រ័ត្រនៅយប់ថ្ងៃទី ២ ខែមេសា ឆ្នាំ ២០២៥ កន្លងមកនេះ អេនណា រ៉ូស ហាក់ជឿជាក់លើសមត្ថភាពខ្លួនឯងខ្លាំងណាស់ទៅលើគោលដៅយកមកុដឱ្យបាន ប៉ុន្ដែជាលទ្ធផល នាងមិនត្រឹមតែខកចិត្តមិនបានទទួលជ័យលាភីនោះទេ សូម្បីតែតំណែង Top ណាមួយ ក៏ រ៉ូស មិនបានទទួលដែរ។
ក្រោយទទួលបានលទ្ធផលខកចិត្តពីការប្រកួតបវរកញ្ញាមួយនេះ ស្រាប់តែ អេនណា រ៉ូស បានឡាយវីដេអូ និង ផុសសារប្រតិកម្មជាច្រើនទាំងយប់ ដែលក្នុងចំណោមសារទាំងអស់នោះ មានសារមួយត្រូវបានមហាជនចាប់អារម្មណ៍ខ្លាំង ដោយនាងបានរៀបរាប់ថា ៖ «ត្រឹមសម្បត្តិបវរកញ្ញាមានអីអស្ចារ្យ ជំទាវឧកញ៉ាបានអស្ចារ្យ ក្តីស្រមៃ តែជំទាវឧកញ៉ាដោយខ្លួនេងមិនដោយសារប្តី»៕
