កាលពីរសៀលថ្ងៃទី ០៣ ខែមិថុនា ឆ្នាំ ២០២៥ កន្លងទៅនេះ ប្រជាពលរដ្ឋកម្ពុជា ជាពិសេស កីឡាករ កីឡាការិនីគុនល្បុក្កតោគ្រប់ជំនាន់មានក្តីសោកសង្រេងយ៉ាងខ្លាំង នៃមរណភាពរបស់ឯកឧត្តមព្រឹទ្ធាចារ្យ ក្រមាមាស សាន គឹមស៊ាន ហៅលោកគ្រូតាក្រមាមាស អនុប្រធានសហព័ន្ធកីឡាគុនល្បុក្កតោកម្ពុជា។
ក្នុងនោះតាមរយៈការឱ្យដឹងពីលោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា បានជម្រាបនូវដំណឹងពីសុខភាពរបស់លោកគ្រូតាគុនល្បុក្កតោ សាន គឹមស៊ាន ហៅលោកគ្រូតាក្រមាមាស កាលពីព្រឹកថ្ងៃទី ០៣ ខែមិថុនា ឆ្នាំ ២០២៥ បានចូលបន្ទប់សង្គ្រោះបន្ទាន់ដោយជំងឺបេះដូង។ ជាអកុសល នៅថ្ងៃដដែលនារសៀលម៉ោង ១ និង ៤០ នាទី លោកគ្រូតាក្រមាមាស ក៏បានទទួលមរណភាពដោយរោគាពាធ ក្នុងជន្មាយុ ៨០ ឆ្នាំ។
ស្របពេលដែលមហាជនកំពុងចូលរួមរំលែកទុក្ខ នៃការបាត់បង់ធនធានមនុស្សដ៏សំខាន់ និង ជាបុគ្គល ដែលប្រឹងប្រែងទាំងកម្លាំងកាយចិត្តតស៊ូអស់ជាច្រើនជំនាន់ ខិតខំចងក្រង អភិរក្ស និង លើកកម្ពស់គុនល្បុក្កតោនោះ ងាកមកកាន់កីឡាការិនី សំ ថារ័ត្ន ដែលជាសិស្សរបស់លោកគ្រូបានបង្ហាញអារម្មណ៍មិនអស់ចិត្ត ខណៈសូម្បីតែដង្ហើមចុងក្រោយលោកគ្រូតាក៏នាងទៅមិនទាន់។
ក្នុងនោះ កញ្ញា សំ ថារ័ត្ន បានរៀបរាប់ថា៖ «ជើងទាំងគូ ដែលកូនធ្លាប់ច្របាច់គក់ ម៉ាស្សាឱ្យលោកគ្រូថា «វាចេះធ្វើសរសៃ ឱ្យអញឡើងស្រួល»។ ឥឡូវគ្របដណ្ដប់ជិតឈឹងហើយ ឱ្យកូនម៉ាស្សាលោកគ្រូបានយ៉ាងណាទៀត?? មរតកមនុស្សរស់របស់កូនចៅ អញ្ជើញបានទៅទីស្ងប់សុខហើយ»។
គួរជម្រាបថា ពិធីបុណ្យសពរបស់ឯកឧត្តមព្រឹទ្ធាចារ្យ ក្រមាមាស សាន គឹមស៊ាន ហៅលោកគ្រូតាក្រមាមាស បាន និង កំពុងប្រព្រឹត្តិទៅតាមប្រពៃណី ដោយនៅថ្ងៃព្រហស្បតិ៍ ទី ៥ ខែមិថុនា ឆ្នាំ ២០២៥ ខាងមុខនេះ ពិធីបូជាសពនឹងរៀបចំឡើងនៅវេលាម៉ោង ៤ និង ៤០ នាទី ល្ងាច នៅឯវត្តអង្គតាមិញ៕
