នៅព្រឹកថ្ងៃទី ០៦ ខែមករា ឆ្នាំ ២០២៥ ស្នងការដ្ឋាននគរបាលរាជធានីភ្នំពេញ បានបញ្ជាក់ពីករណីគ្រោះថ្នាក់ចរាចរណ៍មួយនៅចំណុចច្រកចូលបុរីប៉េងហួត លើផ្លូវ ៦០ ម៉ែត្រ កាលពីរាត្រីឈានចូលថ្ងៃទី ០៦ ខែមករា ដែលបណ្ដាលឱ្យបាត់បង់ជីវិតសិល្បកររ៉េបមួយរូបគឺលោក Ruthko។
ទាក់ទិនទៅនឹងរឿងនេះ ស្នងការដ្ឋាននគរបាលរាជធានីភ្នំពេញ បានបញ្ជាក់ឱ្យបានដឹងថា សមត្ថកិច្ចជំនាញបានឃាត់អ្នកបើករថយន្ត LEXUS RX330 នៅការិយាល័យនគរបាលចរាចរណ៍ផ្លូវគោក ដើម្បីយកទៅសួរនាំអនុវត្តតាមនីតិវិធី បន្ទាប់ពីមានករណីគ្រោះថ្នាក់ចរាចរណ៍ វេលាម៉ោង ០១ និង ៣០ នាទី កើតឡើងរវាងរថយន្តម៉ាក LEXUS RX330 ជាមួយម៉ូតូម៉ាក TVS HONDA CRF ចំណុចច្រកចូលបុរីប៉េងហួត លើផ្លូវ ៦០ ម៉ែត្រ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
ក្នុងនោះស្នងការដ្ឋាននគរបាលរាជធានីភ្នំពេញ បានបញ្ជាក់ពីដំណើររឿងឱ្យដឹងថា រថយន្តម៉ាក LEXUS RX330 ពណ៌ស ពាក់ផ្លាកលេខ ខ.ម 2_4771 បើកបរតាមបណ្ដោយផ្លូវ ៦០ ម៉ែត្របើកបរក្នុងទិសដៅពីជើងទៅត្បូង លុះពេលបើកមកដល់ចំណុចកើតហេតុខាងលើបានបត់ឆ្វេងឆ្លងផ្លូវ ក៏បុកជាមួយម៉ូតូមួយគ្រឿង ម៉ាក HONDA CRF ពណ៌ខ្មៅ ពាក់ផ្លាកលេខ បាត់ដំបង 1AL_9616 ដែលធ្វើដំណើរបញ្ច្រាសទិសគ្នា បណ្ដាលឱ្យអ្នកបើកបរម៉ូតូ ស្លាប់នៅកន្លែងកើតហេតុ។
ភាគីរថយន្តម៉ាក LEXUS RX330 ពណ៌ស បើកបរដោយឈ្មោះ ណឹម ណាង ភេទប្រុស អាយុ ៣៥ ឆ្នាំ មុខរបរកងរាជអាវុធហត្ថ មានទីលំនៅផ្ទះជួលលេខ ២៧ ផ្លូវលេខ ១០ (បុរីប៉េងហួត ៦០ ម៉ែត្រ) សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ (អ្នកបើកបររថយន្តនាំមកសាកសួរនៅការិយាល័យនគរបាលចរាចរណ៍ផ្លូវគោក) អ្នកបើកបររថយន្តសមត្ថកិច្ចត្រួតពិនិត្យគឺគ្មានជាតិអាល់កុលនោះទេ។
ចំណែកឯ ភាគីម៉ូតូ ម៉ាក HONDA CRF ពណ៍ខ្មៅ ពាក់ផ្លាកលេខ បាត់ដំបង 1AL_9616 បើកបរដោយ ឈ្មោះ ដាវិឌ ប្ញទ្ធិរុទ្រ ភេទប្រុស អាយុ ២៤ ឆ្នាំ មុខរបរតារាចម្រៀងមានទីលំនៅផ្ទះលេខ ៤៩_៥១ ផ្លូវលេខ ១៦៨ ភូមិទួលរការ ១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
ដោយឡែក នៅវេលាម៉ោងប្រមាណ ១២ ថ្ងៃត្រង់នាថ្ងៃទី ០៦ ខែមករា ឆ្នាំ ២០២៥ ក្រុមការងារព័ត៌មាន និង ប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបញ្ចេញវីដេអូករណីគ្រោះថ្នាក់ចរាចរណ៍របស់តារាចម្រៀងរ៉េប RuthKo ហើយនៅលើផេកហ្វេសប៊ុកផ្លូវការ៕
