ក្រោយពីមានទាហានថៃចំនួន ៤ នាក់បានដើរជាន់មីនម្តងទៀត ពេលនេះភាគីថៃ ហាក់កំពុងរកលេសដុតភ្លើងសង្រ្គាមជាថ្មី ដោយនាយករដ្ឋមន្រ្តី Anutin បានប្រកាសបញ្ចប់កិច្ចព្រមព្រៀងសន្តិភាព និងគាំទ្រយ៉ាងពេញទំហឹងចំពោះសកម្មភាពរបស់យោធា។
យ៉ាងណាមិញ ខណៈរដ្ឋាភិបាលថៃកំពុងត្រៀមដុតភ្លើងសង្រ្គាម ថ្មីៗនេះ សារព័ត៌មានថៃ បានទម្លាយសម្តីរបស់ស្រ្តីវ័យចំណាស់ម្នាក់ ដែលជាកសិករដាំស្រូវនៅតាមជាយដែនខេត្តបុរីរ៉ាំ។ ស្រ្តីរូបនេះ បានបង្ហាញពីកង្វល់ និងទុក្ខលំបាករបស់ខ្លួនថា កុំអាលទាន់បាញ់បោះគ្នាអី សូមទាហានអត់ធ្មត់សិនចុះ សូមអាណិតអ្នកស្រែផង ទឹកកំពុងតែជន់លិច ប្រមូលស្រូវបានយកមកហាលហើយ ក៏នៅតែជន់លិចទៀត អ្នកស្រែធ្វើអ្វីមិនទាន់ទេ។
បើសិនជាមានការប៉ះគ្នាឥឡូវនេះមែន មិនមានគ្រឿងចក្រណាហ៊ានមកច្រូតឱ្យទេ អ្នកស្រែច្រូតខ្លួនឯងក៏មិនកើតដែរ ណាមួយត្រូវភៀសខ្លួនទៀត។ សូមឱ្យអ្នកស្រែប្រមូលផលស្រូវ និងលក់យកលុយទៅសងបំណុលគេសិន ព្រោះជំពាក់គេច្រើនណាស់ ហើយជាពិសេសសូមកុំឱ្យទាហានកុំដើរ ឬចល័តទ័ពពេក ឱ្យឈប់សិនទៅ៕
សូមចុចទីនេះដើម្បីទស្សនាវីដេអូ៖
ប្រភព៖ AMARINTV
