ប្រមាណជា ១២ ម៉ោងបន្ទាប់ពី TikTok បិទមិនឱ្យដំណើរការនៅទឹកដីអាមេរិក ឥលូវនេះវាបានត្រលប់មកវិញ ធ្វើឱ្យអ្នកប្រើប្រាស់នៅអាមេរិករីកមុខមាត់ជាថ្មី។ ការប្រើប្រាស់បានវិញនេះ គេសន្មតថាដោយសារប្រធានាធិបតីជាប់ឆ្នោត លោក Donald Trump ជាអ្នកសង្គ្រោះ។ នេះបើតាមការចេញផ្សាយរបស់សារព័ត៌មាន CNN។
TikTok ស្វាគមន៍អ្នកប្រើប្រាស់នៅអាមេរិកត្រលប់មកវិញជាមួយ notification ថា៖ «អរគុណចំពោះការអត់ធ្មត់ និង ការគាំទ្ររបស់អ្នក។ ជាលទ្ធផលនៃការខិតខំប្រឹងប្រែងរបស់លោកប្រធានាធិបតី Trump TikTok ត្រលប់មកសហរដ្ឋអាមេរិកវិញហើយ!»។
ជាការពិត TikTok ត្រូវបានបិទមិនឱ្យដំណើរការបាននៅអាមេរិកកាលពីយប់ថ្ងៃសៅរ៍ សប្តាហ៍មុន។ ពេលនោះ អ្នកប្រើប្រាស់បានព្យាយាមបើកកម្មវិធី ប៉ុន្តែទទួលបានសារប្រាប់ពីការ offline និង សុំឱ្យអ្នកប្រើប្រាស់រង់ចាំការផ្តល់ព័ត៌បន្ទាប់។ កម្មវិធីនេះក៏មិនអាចប្រើប្រាស់បាននៅលើ Apple និង Google Play Stores ព្រមជាមួយកម្មវិធី Lemon8 និង កម្មវិធី CapCut ដែលសុទ្ធសឹងជាកម្មសិទ្ធិរបស់ក្រុមហ៊ុនចិន TikTok គឺ ByteDance។
យ៉ាងណាមិញ មកដល់ព្រឹកថ្ងៃអាទិត្យ លោក Trump បាននិយាយថា លោកនឹងចេញដីកាប្រតិបត្តិមួយ បន្ទាប់ពីការឡើងតំណែងរបស់លោកនៅថ្ងៃចន្ទ ដើម្បីពន្យារពេលការអនុវត្តច្បាប់ដកឬហាមឃាត់។ មិនបានប៉ុន្មានផង ក្នុងរយៈពេលតែប៉ុន្មានម៉ោងប៉ុណ្ណោះ ការចូលប្រើកម្មវិធី និង គេហទំព័ររបស់ TikTok បានចាប់ផ្តើមត្រលប់មកវិញសម្រាប់អ្នកប្រើប្រាស់អាមេរិក។
ការស្ដារឡើងវិញរបស់ TikTok នឹងក្លាយជាដំណឹងស្វាគមន៍សម្រាប់អ្នកប្រើប្រាស់អាមេរិកប្រមាណ ១៧០ លានគណនី។ អ្នកប្រើកម្មវិធីបានចំណាយពេលច្រើនម៉ោង និង រៀងរាល់ថ្ងៃ ដើម្បីស្វែងរកព័ត៌មាន ការកម្សាន្ត និង សហគមន៍ ហើយជាពិសេស ដើម្បីរកប្រាក់ចំណូលផងដែរ៕
