រាជធានីភ្នំពេញ-កាលពីថ្ងៃសៅរ៍ ទី៦ ខែកញ្ញា ឆ្នាំ២០២៥ នេះ នៅសាលាអន្តរជាតិប្រូមស៍ហ្គ្រូវកម្ពុជា បានរៀបចំកម្មវិធីបើកសម្ពោធដាក់ឱ្យប្រើប្រាស់ជាផ្លូវការនូវសាលារៀនដែលមានម៉ាកយីហោមកពីចក្រភពអង់គ្លេស ក្រោមអធិបតីភាព ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា នៃព្រះរាជាណាចក្រកម្ពុជា និងឯកឧត្តម Dominic Williams ឯកអគ្គរាជទូត នៃចក្រភពអង់គ្លេស ប្រចាំព្រះរាជាណាចក្រកម្ពុជា ឯកឧត្តម លោកជំទាវ លោកអ្នកឧកញ៉ា លោក លោកស្រី មាតាបិតា អ្នកអាណាព្យាបាលសិស្ស និងភ្ញៀវកិត្តិយសជាច្រើនរូបទៀតផងដែរ។
ក្នុងឱកាសនៃពិធីបើកសម្ពោធដាក់ឱ្យដំណើរការជាផ្លូវការនៅក្នុងព្រះរាជាណាចក្រកម្ពុជានេះបានប្រព្រឹត្តិទៅប្រកបដោយភាពស្និទ្ធស្នាល និងរីករាយ ពីសំណាក់គណៈអធិបតី និងភ្ញៀវចូលរួមទាំងអស់។ លោកឧកញ៉ា កែវ សម្បត្តិ ស្ថាបនិក និងជាប្រធាននាយកប្រតិបត្តិ នៃសាលាអន្តរជាតិប្រូមស៍ហ្រ្គូវកម្ពុជា បានថ្លែងប្រាប់អង្គពិធីថា៖ «ការនាំយកម៉ាកយីហោសាលាដែលមានបទពិសោធអប់រំបណ្តុះបណ្តាលជិត ៥០០ឆ្នាំពីចក្រភពអង់គ្លេស មកកាន់កម្ពុជា គឺមិនត្រឹមតែជាការនាំយកសាលារៀនដែលមានគុណភាពខ្ពស់ប៉ុណ្ណោះទេ តែថែមទាំងនាំមកនូវទំនុកចិត្តចំពោះការអប់រំ មកជូនដល់មាតាបិតា អ្នកអាណាព្យាបាលសិស្សនៅកម្ពុជាយើងផងដែរ ដើម្បីជួយសម្រេចនូវរាល់ការរំពឹងទុក និងក្តីសង្ឃឹមរបស់ពួកគាត់ ដែលមានចំពោះបុត្រធីតារបស់ខ្លួន ហើយនេះ ក៏ជាការចូលរួមចំណែកជាមួយនឹងរាជរដ្ឋាភិបាល ក្នុងការលើកស្ទួយវិស័យអប់រំនៅកម្ពុជាផងដែរ។»
ឯកឧត្តម Dominic Williams ឯកអគ្គរាជទូតនៃចក្រភពអង់គ្លេស ប្រចាំព្រះរាជាណាចក្រកម្ពុជា ក៏បានចូលរួមសម្តែងការគាំទ្រ និងសោមនស្សជាខ្លាំង ដែល លោកឧញ៉ា កែវ សម្បត្តិ បាននាំមកនូវគ្រឹះស្ថានអប់រំដែលមានជំនាញ និងបទពិសោធជិត៥០០ឆ្នាំ ក្នុងការបណ្តុះបណ្តាលក្នុងវិស័យអប់រំនៅចក្រភពអង់គ្លេស មកកាន់ប្រទេសកម្ពុជា។
ក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី បានមានប្រសាសន៍ថា៖«ការសម្ពោធដាក់ឱ្យប្រើប្រាស់ជាផ្លូវការសាលាអន្តរជាតិប្រូមស៍ហ្គ្រូវកម្ពុជា គឺជាសមិទ្ធផលថ្មីមួយទៀតរបស់វិស័យអប់រំ ដែលរាជរដ្ឋាភិបាលបានបង្កបរិយាកាសអំណោយផលឱ្យផ្នែកឯកជនចូលរួមវិនិយោគលើវិស័យអប់រំ ការបណ្តុះបណ្តាលបច្ចេកទេស និងវិជ្ជាជីវៈ ដើម្បីរួមចំណែកក្នុងការកសាងធនធានមនុស្សនៅកម្ពុជាប្រកបដោយគុណភាពខ្ពស់ ជាពិសេសបានឆ្លុះបញ្ចាំងពីការរីកចម្រើននៃវិ ស័យអប់រំនៅកម្ពុជា ក៏ដូចជាការពង្រឹងកិច្ចសហប្រតិបត្តិការអប់រំរវាងព្រះរាជាណាចក្រកម្ពុជា និងចក្រភពអង់គ្លេសផងដែរ។»
ជាមួយនឹងក្តីសង្ឃឹមយ៉ាងមុតមាំថា បុត្រធីតាកម្ពុជាជាច្រើនរូប នឹងមានឱកាសទទួលបាននូវការអប់រំប្រកប ដោយគុណភាព និងប្រសិទ្ធិភាពខ្ពស់កម្រិតបទដ្ឋានអន្តរជាតិ លោកស្រី Philippa Barson នាយិកាសាលាអន្តរជាតិប្រូមស៍ហ្គ្រូវកម្ពុជា បានបញ្ជាក់ពីភាពរីករាយនិងការប្តេជ្ញាចិត្ត ក្នុងការមើលថែ និងអប់រំបណ្តុះបណ្តាលដល់សិស្សានុសិស្សដែលនឹងមករៀននៅឆ្នាំសិក្សាថ្មី២០២៥-២០២៦ នេះដែរ។
ការនាំយកនូវសាលាប្រូមស៍ហ្គ្រូវ មកកម្ពុជានៅពេលនេះ គឺមិនត្រឹមតែជាឱកាសនៃការបណ្តុះបណ្តាលកុលបុត្រកុលធីតាយើងតែប៉ុណ្ណោះទេ តែក៏ជាឱកាសមួយនៃការរឹតបន្តឹងចំណងទំនាក់ទំនងរវាងប្រជាជាតិ នៃប្រទេសទាំងពីរផងដែរ។ តាមរយៈនៃការបង្ហាត់បង្រៀន និងរៀននៅសាលាអន្តរជាតិប្រូមស៍ហ្គ្រូវនេះ យើងសង្ឃឹមថាសិស្សានុសិស្ស និងក្រុមគ្រួសារជាច្រើន នឹងបានសិក្សាស្វែងយល់ពីវប្បធម៌ និងសេដ្ឋកិច្ចនៃប្រទេសទាំងពីរបានកាន់តែច្រើន ព្រមទាំងនឹងអាចនាំយកនូវចំណេះដឹងទាំងនេះមកអភិវឌ្ឍខ្លួន និងប្រទេសជាតិរបស់យើងឱ្យបានកាន់តែរីកចម្រើនឡើងថែមទៀត។
សូមបញ្ជាក់ថា សាលាប្រូមស៍ហ្គ្រូវ គឺជាសាលាមួយកំពុងឈានមុខគេក្នុងការផ្តល់នូវគុណភាពខ្ពស់នៃការអប់រំនៅចក្រភពអង់គ្លេស ហើយមាននៅប្រទេសថៃ និងនៅប្រទេសចិន ហើយពេលនេះមានវត្តមាននៅក្នុងព្រះរាជាណាចក្រកម្ពុជាយើងហើយ។
សាលាអន្តរជាតិប្រូមស៍ហ្គ្រូវកម្ពុជា ទទួលសិស្សានុសិស្សឱ្យចូលសិក្សាចាប់ពីអាយុ ២ឆ្នាំឡើងទៅ រហូតដល់ បញ្ចប់មធ្យមសិក្សាថ្នាក់ទី១២ ដោយសាលាបានបំពាក់នូវបរិក្ខាយ៉ាងសម្បូរបែប និងទំនើបទាន់សម័យ ដែលជួយឱ្យសិស្សានុសិស្សរបស់យើងអាចរៀន និងអនុវត្តជាក់ស្តែងបានយ៉ាងងាយស្រួល។ ជាមួយគ្នានេះដែរ សាលារបស់យើងត្រូវបានសាងសង់ឡើងលើបរិវេណដីដែលមានទំហំមួយម៉ឺនម៉ែត្រការ៉េបួនជ្រុង ស្ថិតនៅលើផ្លូវឧកញ៉ា ម៉ុង ឬទ្ធី ក្នុងសង្កាត់ក្រាំងធ្នង់ ខណ្ឌសែនសុខ ហើយជាអគារសិក្សាផ្ទាល់ខ្លួនរបស់ស្ថាបនិកសាលា ដែលបង្កនូវលក្ខណៈងាយស្រួល និងមានប្រសិទ្ធភាពជាខ្លាំង ក្នុងការបង្ហាត់បង្រៀនសិស្សានុសិស្សគ្រប់មុខវិជ្ជា ទាំងកម្មវិធីសិក្សា កីឡា និងសិល្បៈ នៅក្នុងទីតាំងតែមួយតែម្តង។
នៅទីបញ្ចាប់ គណៈអធិបតីរបស់យើងបានអំពាវនាវដល់ភ្ញៀវកិត្តិយស និងក្រុមគ្រួសារទាំងអស់ ឱ្យចូលរួមគាំទ្រដល់សាលាអន្តរជាតិប្រូមស៍ហ្គ្រូវកម្ពុជា ដើម្បីទទួលបាននូវសេវាអប់រំដែលមានគុណភាពខ្ពស់ ក៏ដូចជាជួយគាំទ្រការអភិវឌ្ឍចំណេះជំនាញរបស់បុត្រធីតាកម្ពុជាយើង ឱ្យបានខ្លាំងក្លាទាំងអស់គ្នា។
សម្រាប់ព័ត៌មានលម្អិត សូមទាក់ទងមកកាន់សាលាដោយផ្ទាល់តាមរយៈទូរស័ព្ទលេខ 012 718 555 ឬ 016 718 555៕
