នៅថ្ងៃទី ៣ តុលា ឆ្នាំ ២០២៥ នេះ មានការរាយការណ៍ថា ប្រទេសអាល្លឺម៉ង់បានបញ្ជាផ្អាកដំណើរការព្រលានយន្តហោះនៅទីក្រុង Munich ភ្លាមៗ ក្រោយពីប្រទះឃើញដ្រូនមួយចម្លែកហោះក្រឡឹងនៅក្បែរនោះ។
តាមព័ត៌មានបានឱ្យដឹងថា គេបានប្រទះឃើញដ្រូនចម្លែកនេះហោះនៅក្បែរព្រលានយន្តហោះ Munich កាលពីល្ងាចថ្ងៃទី ២ ខែតុលា ឆ្នាំ ២០២៥ កន្លងទៅ ហើយភ្លាមៗអាជ្ញាធរបានប្រតិកម្មឆ្លើយតប ដោយរំសាយជើងហោះហើរចំនួន ១៧ ជើង និងជើងហោះហើរចំនួន ១៥ ទៀត ត្រូវបង្ខំឱ្យប្តូរទៅកាន់ព្រលានយន្តហោះ Vienna Frankfurt Stuttgart និង Nuremberg ជំនួសវិញ ដែលបង្កឱ្យមានការប៉ះពាល់ទៅដល់អ្នកដំណើរសរុបជាង ៣០០០ នាក់ឯណោះ។
យ៉ាងណាមិញ មូលហេតុដែលអាល្លឺម៉ង់មានការប្រុងប្រយ័ត្នខ្លាំងយ៉ាងដូច្នេះ គឺដោយសារតែថ្ងៃទី ៣០ ខែកញ្ញា ឆ្នាំ ២០២៥ កន្លងទៅ ប្រទេសដាណឺម៉ាក ដែលជាអ្នកជិតខាងរបស់ខ្លួន ត្រូវបានដ្រូនមិនស្គាល់ប្រភពវាយប្រហារដែនអាកាស។ ក្នុងនោះ នាយករដ្ឋមន្រ្តីដាណឺម៉ាក បានប៉ាន់ស្មានថានេះអាចជាស្នាដៃរបស់រុស្ស៊ី តែខាងរុស្ស៊ីបានចេញមុខបដិសេធការចោទប្រកាន់នេះ ដោយបញ្ជាក់ថាមិនមែនដ្រូនរបស់ខ្លួនឡើយ៕
