នៅរសៀលថ្ងៃទី ១៤ ខែកក្កដា ឆ្នាំ ២០២៥ នេះ មហាជនអ្នកគាំទ្រ ក៏ដូចជាអ្នកសិល្បៈបានសម្ដែងនូវការសោកស្ដាយ និង រំលែកទុក្ខជាមួយតារាសម្ដែងប្រុស សេង មង្គល យ៉ាងខ្លាំង ដែលលោកកំពុងជួបទុក្ខធំបាត់បង់មនុស្សជាទីគោរពស្រឡាញ់គ្មានថ្ងៃត្រឡប់ គឺលោកយាយបង្កើតរបស់លោកបានទទួលមរណភាពហើយ។
បើតាមរយៈគណនីហ្វេសប៊ុករបស់តារាសម្ដែងប្រុសលោក សេង មង្គល បានបង្ហោះរូបភាពជាមួយជីដូន បង្ហាញការកាន់ទុក្ខភ្ជាប់ជាមួយអារម្មណ៍រំជួលចិត្តពេញដោយក្ដីអាល័យ ចំពោះការចាកចេញរបស់ជីដូនជាទីស្រឡាញ់។
ក្រោយទទួលដំណឹងមរណភាពដ៏ក្រៀមក្រំនេះ មហាជនក៏ដូចជាអ្នកសិល្បៈ បានបង្ហាញការសោកស្ដាយជាពន់ពេក ព្រមទាំងបានចូលរួមរំលែកទុក្ខជាមួយលោក និង ក្រុមគ្រួសារជាបន្តបន្ទាប់ផងដែរ ជាពិសេសនោះមហាជនក៏សម្ដែងក្ដីសោកស្ដាយ ខណៈ សេង មង្គល បានខិតខំរកលុយសាងសង់ផ្ទះវីឡាក្នុងបំណងចង់ឱ្យលោកយាយ និង ឪពុកម្ដាយរស់នៅជុំគ្នា ប៉ុន្ដែផ្ទះសាងសង់មិនទាន់រួចរាល់ផង លោកបែរជាត្រូវបាត់បង់លោកយាយជាទីស្រឡាញ់ទៅវិញ៕
