មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការភ្ញាក់ផ្អើល និង ចែករំលែកបន្តគ្នាព្រោងព្រាត ទាក់ទិនទៅនឹងករណីប្រជាពលរដ្ឋនៅខេត្តកំពង់ធំ បានជីកប្រឡាយប្រទះឃើញបដិមាមួយអង្គ ដែលត្រូវបានកប់ក្នុងដី ក្នុងភូមិសាស្ត្រខេត្តកំពង់ធំ។
វីដេអូដែលកំពុងផ្ទុះការចាប់អារម្មណ៍នេះផងដែរ ត្រូវបានបង្ហោះឡើងដោយគណនីដែលមានឈ្មោះ អា ឈីញ ឈីញ នៅថ្ងៃទី ១៤ ខែសីហា ឆ្នាំ ២០២៥ បង្ហាញពីបដិមាមួយអង្គរុំព័ទ្ធទៅដោយដី ជាប់មកជាមួយដែកកាយដី អេស្កាវ៉ាទ័រ ដែលពលរដ្ឋកំពុងជីកប្រឡាយ។
ទាក់ទិនទៅនឹងករណីនេះ បើតាមការសន្និដ្ឋានដំបូងពីគណនីដែលមានឈ្មោះ Yongsoeng Loeung បានបញ្ជាក់នៅថ្ងៃទី ១៥ ខែសីហា ឆ្នាំ ២០២៥ នេះ ឱ្យបានដឹងថា ករណីខាងលើគឺជាការប្រទះឃើញប្រតិមា (ព្រះពោធិសត្វ?) សិល្បៈខ្មែរសតវត្សរ៍ទី ១០ វត្ថុធាតុដើមពីលោហៈ ទម្ងន់ប្រមាណ ២០ គីឡូ ដែលត្រូវប្រជាពលរដ្ឋជីកប្រឡាយប៉ះនៅភូមិពង្រ ឃុំកកោះ ស្រុកសន្ទុក ខេត្ដកំពង់ធំ៕
