ចាកចេញពីស្រុកខ្មែរ ២៥ ឆ្នាំ តារាចម្រៀង ឆោម និមល បង្កើតក្រុមតន្ត្រីល្បីឈ្មោះមួយនៅអាមេរិក និង ទើបវិលមកស្រុកកំណើតទទួលមេដាយថ្នាក់ជាតិ

បើគិតមកដល់ពេលនេះ រយៈពេលប្រមាណជា ២៥ ឆ្នាំមកហើយ ដែលតារាចម្រៀងកម្ពុជា អ្នកនាង ឆោម និមល បានចាកចេញពីប្រទេសកម្ពុជាទៅរស់នៅឯសហរដ្ឋអាមេរិក នាទឹកដីទីក្រុង Los Angeles រដ្ឋ California។

ងាកទៅក្រោយបន្តិច មុននឹងចាកចេញទៅរស់នៅឯនាយសមុទ្រ មហាជនក្មេងចាស់ប្រុសស្រីជាច្រើនច្បាស់ជាបានជ្រាបមកហើយនូវជីវប្រវត្តិរបស់តារាចម្រៀងស្រី ឆោម និមល ដែលជាសិល្បការិនីផ្នែកចម្រៀងដុះពន្លកចេញពីកម្មវិធីប្រកួតចម្រៀងមួយកាលពីអំឡុងឆ្នាំ ១៩៩៧ របស់ស្ថានីយទូរទស្សន៍អប្សរា ដោយអ្នកនាង ឆោម និមល ទទួលបានចំណាត់ថ្នាក់លេខ ១ ដូចគ្នានឹងបងប្រុសបង្កើតរបស់អ្នកនាង គឺតារាចម្រៀង ឆោម ប៊ុនយ៉ុង ដោយបច្ចុប្បន្នលោក គឺជាព្រះសង្ឃ។ ម្យ៉ាងវិញទៀត បើនិយាយពីសមាជិកគ្រួសារវិញ អ្នកនាង ឆោម និមល គឺមានឪពុកម្តាយជាអ្នកសិល្បៈ និង បងស្រីធំ គឺអ្នកស្រី ឆោម ឆវិន ក៏ជាតារាចម្រៀងដូចគ្នាដែរ។

ត្រឡប់មកកាន់ជីវិតរស់នៅឯសហរដ្ឋអាមេរិកវិញ អ្នកនាង ឆោម និមល ក៏មិនបានបោះបង់អាជីពជាតារាចម្រៀងនោះដែរ ដោយបច្ចុប្បន្ន អ្នកនាង បានបង្កើតក្រុមតន្ត្រីដ៏ល្បីមួយមានឈ្មោះថា Dengue Fever និង បានចេញសម្តែងជាច្រើនប្រទេសមកហើយដែរ។ ក្នុងនោះ កាលពីពាក់កណ្តាលខែមីនា ឆ្នាំ ២០២៥ កន្លងទៅ អ្នកនាង និង សមាជិកក្រុម Dengue Fever ទើបតែបានចូលរួមសម្តែងក្នុងកម្មវិធី music festival PTY នៅឯប្រទេសថៃ។

ម្យ៉ាងវិញទៀត ថ្មីៗនេះ អ្នកនាង ឆោម និមល ក៏បានវិលត្រឡប់មកកាន់ប្រទេសកម្ពុជាជាថ្មីម្តងទៀតដែរ ដើម្បីចូលរួមកម្មវិធី «អបអរសាទរទិវាវប្បធម៌ជាតិ ៣ មីនា លើកទី ២៧» និង «ពិធីសំណេះសំណាល ពិសាអាហារសាមគ្គីជាមួយសិល្បករ សិល្បការិនីលើកទី ៦» ជាមួយនឹងតារាសម្តែងជើងចាស់ ឯកឧត្តម យស ប៊ូវណ្ណៈ និង ភរិយា លោកជំទាវ លី ស៊ីថារី ព្រមទាំងសិល្បករ សិល្បការិនីកម្ពុជាមកពីសហរដ្ឋអាមេរិកជាច្រើនទៀត។

ដំណើរនៃការវិលត្រឡប់មកកាន់ប្រទេសកម្ពុជានាដើមខែមីនា ឆ្នាំ ២០២៥ កន្លងទៅនេះ អ្នកនាង ឆោម និមល ក៏មានកិត្តិយសត្រូវបានបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បំពាក់មេដាយថ្នាក់ជាតិជូន ក្នុងន័យនេះ គឺដើម្បីជាការលើកទឹកចិត្តដល់កិច្ចខិតខំប្រឹងប្រែងយ៉ាងសកម្មរបស់សិល្បករ សិល្បការិនី ដែលបានលះបង់ទាំងកម្លាំងកាយចិត្តទាំងពេលវេលា និង ស្មារតីក្នុងការថែរក្សា និងលើកតម្កើង ផ្សព្វផ្សាយវប្បធម៌ខ្មែរនៅឯក្រៅប្រទេស៕