ប្រិយមិត្តបានដឹងរួចមកហើយពីជីវិតពិតតារាសម្តែង សឿន វីតា បន្ទាប់ផុងខ្លួនក្នុងរឿងបណុលដែលលោកមិនខ្លាចនឹងបើកបង្ហាញប្រាប់ដល់មហាជន។ បច្ចុប្បន្ននេះ លោកពិតជាបានខំប្រឹងណាស់ ដោយរកស៊ីផង ធ្វើការផង ដើម្បីរកប្រាក់ចំណូលផ្គត់ផ្គង់ជីវភាព និង ដោះបំណុល តែខណៈលោកនៅមិនទាន់បានស្រាលខ្លួននៅឡើយ ដោយសារសាច់ប្រាក់បំណុលនៅសល់ខ្ទង់ម៉ឺនដុល្លារទៀត។
យ៉ាងណាក៏ដោយ មហាជនក៏បានសរសើរ និង លើកទឹកចិត្តដល់តារាសម្តែង សឿន វីតា ដែលមិនរត់ចោលពីបញ្ហា ហើយថែមទាំងបានខំប្រឹងប្រែងរកចំណូល ដោយការបង្កើតមុខរបរមួយចំនួន ដូចជា លក់ម្ហូបអាហារ ផ្សាយលក់ផលិតផលមួយចំនួន ដើម្បីទទួលបានប្រាក់ចំណូលបន្ថែមចិញ្ចឹមប្រពន្ធកូន និង ដោះបំណុល ដោយប្រឹងប្រែងមួយរយៈធំនេះ លោកនៅសល់បំណុលប្រមាណ ១៤ ម៉ឺនដុល្លារទៀត។
យ៉ាងណាមិញ ងាកទៅកាន់ការងារសិល្បៈឯណោះវិញ ថ្មីៗនេះ លោក សឿន វីតា បានឱ្យដឹងថា មានផលិតករបានហៅលោកទៅថត និង សួរពីតម្លៃនៃការថតរបស់លោក ដោយលោកយកកម្រៃ ១ ម៉ឺនដុល្លារ នៃការថតរឿងភាគរយៈពេល ២០ ថ្ងៃ។ ក្នុងតម្លៃនេះ លោក សឿន វីតា ត្រូវបានផលិតករបដិសេធ និង លើកឡើងថា លោកយកថ្លៃជាងតួល្បីរហូតធ្វើឱ្យលោកបានបង្ហោះសាររៀបរាប់មូលហេតុចម្បងមួយ។
លោក សឿន វីតា រៀបរាប់ថា៖ «ថ្ងៃនេះ មានគេតេមកហៅថតរឿង ហើយតម្លៃខ្លួនថតគិតម៉េច? ខ្ញុំថារឿងអីបង? គាត់ថារឿងភាគ ថតប្រហែល ២០ ថ្ងៃ ហើយខ្ញុំប្រាប់ថាខ្ញុំយក ១ ម៉ឺនដុល្លារបង! ពេលនោះចម្លើយ គឺយកថ្លៃជាងតារាគេល្បីទៀត ខ្ញុំហៅ វីតា ឯងថតកុំឱ្យបាត់មុខនឹងសិល្បៈ កុំឱ្យគេភ្លេចមុខ។ បន្ទាប់មក ខ្ញុំក៏ឆ្លើយទៅវិញថា បងរាល់ថ្ងៃខ្ញុំល្បីហើយបង តែមិនល្បីក្នុងរឿងទេ គឺល្បីជីវិតពិតក្នុងសង្គមខ្មែរ ហើយបងយកបានខ្ញុំថត កុងត្រាលុយហាមថតជំពាក់ ចុងក្រោយគាត់ ថាមិនអាចយកបាន។ ខ្ញុំផ្តល់តម្លៃឱ្យខ្លួនឯងខ្ញុំ ទោះអ្នកមិនផ្តល់តម្លៃឱ្យខ្ញុំក៏ដោយ។ សូមផ្តល់តម្លៃឱ្យតារាសិល្បៈផងណាបងៗ កុំឱ្យកើបលុយយកតែម្នាក់ឯងអី តួៗក្រវេទនា ហើយផលិតកម្មខ្លះថតជំពាក់រាប់ឆ្នាំ»៕
