មហាជនអ្នកប្រើប្រាស់បណ្ដាញសង្គម បាននាំគ្នាសម្ដែងក្ដីអាណិតអាសូរ ព្រមទាំងចែករំលែកជាសារដាស់តឿនព្រោងព្រាត បន្ទាប់ពីយុវតីមួយរូប ត្រូវបានមនុស្សឆ្កួតហក់វាយទាំងកម្រោល ពេលជិះម៉ូតូទៅធ្វើការនៅព្រឹកថ្ងៃទី ២០ ខែកុម្ភៈ ឆ្នាំ ២០២៥ ត្រង់ចំណុចទល់មុខមន្ទីរពេទ្យព្រះកេតុមាលា។
ទាក់ទិនទៅនឹងរឿងនេះ យុវតីដែលមានគណនីឈ្មោះ Zeii Phea បានបង្ហោះសារនៅរសៀលថ្ងៃទី ២០ ខែកុម្ភៈ ឆ្នាំ ២០២៥ នេះឱ្យបានដឹងថា ៖ «ជិះម៉ូតូទៅធ្វើការសុខៗសោះ មានបុរសម្នាក់លោតមកវាយខ្ញុំទាំងកម្រោលដោយមិនដឹងមូលហេតុទាំងព្រឹក។ ហើយអ្នកនៅទីនោះនិយាយថា វាជារឿងធម្មតាទេក្មួយ ដែលមានមនុស្សបែកថ្នាំមកវាយគេអ៊ីចឹងហើយរត់ទៅបាត់ ហើយគាត់ថែមទៀតថាមិនមែនតែម្នាក់ទេច្រើនណាស់ ឮហើយបានត្រឹមស្រឡាំងកាំងញ័រអស់ហើយធ្វើអ្វីមិនចេញ»។
ភ្ជាប់ជាមួយនឹងរូបភាពរងរបួស យុវតីរូបនេះបានបន្តទៀតថា ៖ «នេះខ្ញុំពាក់មួកការពារ ហើយពាក់វែនតាទៀតនៅរហែកប៉ុណ្ណឹងហើយ ចុះបើអត់តើទៅជាយ៉ាងណា? ហើយចុះបើវាមានកាំបិត ឬ មានរបស់មុតស្រួច តើទៅជាយ៉ាងណា? ហេតុអ្វីបានគ្មានវិធានការអ្វីសោះ? មិចបានទុកឱ្យទៅជាទម្លាប់? ចុះបើកើតលើគ្រួសារអ្នកហើយប៉ះពាល់ដល់ជីវិតគ្រួសារអ្នក? តើអ្នកមានអារម្មណ៍យ៉ាងមុិច? ធ្លាប់គិតថាពេលយប់បានគ្មានសុវត្តិភាព តែនេះទាំងព្រឹក។ លែងហ៊ានជិះម៉ូតូ លែងហ៊ានទៅធ្វើការ ឬ ទៅណា ដោយសារសង្គមបច្ចុប្បន្ន ពោរពេញដោយមនុស្សឆ្គួតដោយសារគ្រឿងញៀន។ ចំណុចកើតហេតុ៖ ទល់មុខពេទ្យកេតុមាលា»៕
