នៅថ្ងៃទី ១១ ខែកញ្ញា ឆ្នាំ ២០២៥ នេះ មានករណីឡានទាហានមួយគ្រឿង បានដាច់ហ្វ្រាំងជ្រុលធ្លាក់ជ្រោះ ខណៈធ្វើដំណើរទៅប្រតិបត្តិការនៅក្នុងខេត្តសុងក្លា បណ្តាលឱ្យទាហាន ៨ នាក់បានរងរបួស។
តាមព័ត៌មានបានឱ្យដឹងថា ហេតុការណ៍នេះបានកើតឡើងនៅលើផ្លូវមួយខ្សែ ស្ថិតនៅក្នុងឃុំណាតថាក់វី ស្រុកណាតថាក់វី ខេត្តសុងក្លា ដោយឡានទាហានខាងលើនេះបានចេញទៅប្រតិបត្តិការចាប់ជនបង្កអសន្តិសុខ នៅក្នុងស្រុកសាក់បាយ៉យ តែទៅមិនទាន់ដល់ផង ស្រាប់តែឡានក៏បានដាច់ហ្វ្រាំង ធ្វើឱ្យជ្រុលធ្លាក់ពីលើផ្លូវចូលទៅក្នុងជ្រោះនៅក្បែរនោះតែម្តង។
យ៉ាងណាមិញ ក្នុងនោះមានទាហាន ៨ នាក់បានរងរបួសក្នុងហេតុការណ៍នេះ ហើយត្រូវបានគេបញ្ជូនទៅសង្រ្គោះនៅមន្ទីរពេទ្យរួចរាល់។ ដោយឡែក តាមព័ត៌មានបានឱ្យដឹងថា អ្នកបើកអាចមិនសូវចំណាប់បើកលើផ្លូវបែបនេះ ម្យ៉ាងក៏ប្រញាប់ទៅប្រតិបត្តិការទៀត ទើបធ្វើឱ្យកើតទៅជាឧបទ្ទវហេតុបែបនេះ៕
ប្រភព៖ Khaosod
