ពិធីបុណ្យសែនឆេងម៉េង ឬ សែនផ្នូរ បាន និង កំពុងឈានមកដល់ ដែលអ្នកជាកូនចៅចិន ឬ ជាប់សែស្រឡាយចិន តែងនាំគ្នាទៅបោសសម្អាតផ្នូរ និង រៀបចំសំណែនសែនជូនដូនតា ដើម្បីបង្ហាញពីការរឭករបស់ខ្លួនចំពោះបុព្វបុរស។ ចំណោមម្ហូបសែនជូនដូនតាដូចជា មាន់ ទា ជ្រូក …ជាដើម ក្នុងនោះ មានអាហារសមុទ្រមួយគឺ ងាវស្រុស ត្រូវបានគេចាត់ទុកជាសំណែនដ៏សំខាន់សម្រាប់ឆេងម៉េង។
តាមរយៈទំព័រហ្វេសប៊ុកឈ្មោះថា ហុងស៊ុយ របស់លោកគ្រូចិនសែ ម៉ុង បានសរសេរលម្អិតអំពីការសែនងាវស្រុសនៅរដូវឆេងម៉េងយ៉ាងដូច្នេះថា៖ «ងាវស្រុស គឺពិតជាសំខាន់សម្រាប់ការសែនឆេងម៉េង (សែនផ្នូរ )។ ងាវ តំណាងឱ្យភាពស្ងប់ស្ងាត់ ភាពរក្សាទុកនូវទ្រព្យសម្បត្តិ ភាពរក្សាការស្រលាញ់សាច់ឈាមខ្លួនឯង កុំឱ្យមានជម្លោះ បងប្អូនស្រលាញ់គ្នា។ ងាវស្រុស ១ ចាន អាចដាក់សែនជាមួយគ្រឿងសំណែនផ្សេងៗ ស្រុសធម្មតា កុំដាក់គ្រឿងផ្សំរសជាតិចូលអី។ ពេលសែនហាមដាក់ទឹកម្រេចក្រូចឆ្មារសែនជាមួយ តែពេលសែនហើយបងប្អូនអាចយកងាវនោះមកពិសាជាមួយទឹកម្រេចបាន។
ពេលសែនចប់ ប្រក់ផ្នូរ ដុតក្រដាសសែនហើយអស់ បងប្អូនអាចប្រមូលគ្នាមកហូបងាវស្រុសនេះបានម្នាក់ហូប ៣ ទៅ ៥ គ្រាប់តាមជាក់ស្ដែង ហើយសម្បកងាវត្រូវបោះពីមុខផ្នូរ នោះរៀងៗខ្លួន។ ធ្វើបែបនេះ គេជឿថា ៖ ១. កុងម៉ា អាចដឹងថា កូនចៅណាខ្លះមកសែនផ្នូរគាត់, ២. ឱ្យផ្នូរកុងម៉ាត្រជាក់ត្រជំ គឺត្រជាក់ត្រជំដល់កូនចៅដូចគ្នា, ៣. រក្សាទ្រព្យសម្បត្តិកូនចៅឱ្យល្អ»៕
