ជាការពិតណាស់ រយៈពេលត្រឹមប្រមាណជា ៣-៤ ឆ្នាំ ក្នុងវិស័យសិល្បៈ អ៊ឹងហាវ ត្រូវបានមហាជនកត់សម្គាល់ពីកេរ្តិ៍ឈ្មោះរបស់លោកពិតជាមិនធម្មតា ដោយមិនត្រឹមតែមានប្រជាប្រិយភាពក្នុងប្រទេសកម្ពុជានោះឡើយ តែលោកមានភាពល្បីល្បាញ និង ជាតារាសកម្មក្នុងពិភពសិល្បៈនៅសិង្ហបុរីទៀតផង។
ក្នុងនោះ អ៊ឹងហាវ មានទីផ្សារខ្លាំងជាមួយការថតបង្ហាញម៉ូដ ថតផ្សព្វផ្សាយពាណិជ្ជកម្ម ជាពិសេសថតសម្តែងភាពយន្ត។ ម្យ៉ាងវិញទៀត ថ្មីៗនេះ អ៊ឹងហាវ ក៏បានចាប់យកជំនាញផ្នែកច្រៀង និង បានចេញ MV ចម្រៀងផ្ទាល់ខ្លួនផងដែរ។
ងាកមកកាន់រូបសម្រស់ឯណោះវិញ មហាជនធ្លាប់បានធ្លោយមាត់សរសើរកំលោះរូបសង្ហាមកពីខេត្តបាត់ដំបង អ៊ឹងហាវ ដែរ ដែលលោកមិនត្រឹមតែមានសមត្ថភាពនោះ តែរូបសម្រស់វិញស្រស់សង្ហាស្រដៀងកូនកាត់ចិន និង កូរ៉េ។
ជាការពិត លោក អ៊ឹងហាវ មិនមែនជាកូនកាត់សញ្ជាតិបរទេសអ្វីនោះឡើយ ពោលគឺលោកជាកូនខ្មែរសុទ្ធ កូនអ្នកខេត្តបាត់ដំបង ដោយមុខមាត់សម្រស់របស់លោកកាត់រកអ្នកម្តាយសឹងទាំងស្រុងតែម្តង៕
